चालु आर्थिक वर्षका योजना र बजेट कार्यान्वयनबारे सुनापति गाउँपालिकाको सार्वजनिक सुनुवाइ सम्पन्न

रामेछापको सुनापति गाउँपालिकाले चालु आर्थिक वर्ष २०८२/०८३ को सार्वजनिक सुनुवाइ कार्यक्रम सम्पन्न गरेको छ। कार्यक्रममा गाउँपालिकाले चालु आर्थिक वर्षमा सञ्चालन भएका विकास योजना, बजेट कार्यान्वयनको अवस्था तथा सेवा प्रवाहबारे स्थानीय नागरिकलाई विस्तृत जानकारी गराएको थियो।

गाउँपालिकाका अनुसार यस आर्थिक वर्षमा विभिन्न पूर्वाधार, शिक्षा, स्वास्थ्य, कृषि तथा सामाजिक विकासका योजनाहरू कार्यान्वयन गरिएका छन्। साथै, स्थानीय सरकार सञ्चालनलाई थप प्रभावकारी, पारदर्शी र उत्तरदायी बनाउन गाउँकार्यपालिकाबाट २४ वटा कानुन स्वीकृत गरिएको जानकारी पनि सार्वजनिक सुनुवाइमार्फत दिइएको छ।

कार्यक्रममा जनप्रतिनिधि, कर्मचारी, सरोकारवाला निकाय तथा स्थानीय नागरिकहरूको सहभागिता रहेको थियो। सहभागीहरूले गाउँपालिकाको कामकारबाही, बजेट खर्च, विकास निर्माण र सेवा प्रवाहबारे जिज्ञासा तथा सुझाव राखेका थिए भने गाउँपालिकाले उठेका प्रश्नहरूको जवाफ दिँदै आगामी दिनमा अझ प्रभावकारी, पारदर्शी र जनउत्तरदायी ढंगले सेवा प्रवाह गर्ने प्रतिबद्धता व्यक्त गरेको छ।

सार्वजनिक सुनुवाइलाई स्थानीय सरकार र नागरिकबीचको विश्वास, जवाफदेहिता र सुशासन सुदृढ गर्ने महत्त्वपूर्ण माध्यमका रूपमा समेत लिइएको छ।