देउवाको पुनरावलोकन निवेदनमा आज सर्वोच्चमा सुनुवाइ

काठमाडौं  साउन २१ :  नेपाली कांग्रेसको आधिकारिकता विवादसम्बन्धी सर्वोच्च अदालतले यसअघि दिएको आदेशउपर निवर्तमान सभापति शेरबहादुर देउवाले दायर गरेको पुनरावलोकन निवेदनमा आज सुनुवाइ हुँदैछ।

देउवाले दायर गरेको पुनरावलोकन निवेदन सर्वोच्च अदालतको पूर्ण इजलासमा पेश गरिएको हो। उक्त निवेदनमाथि प्रधानन्यायाधीश मनोज शर्मा तथा न्यायाधीश नित्यानन्द पाण्डे र श्रीकान्त पौडेलको इजलासमा सुनुवाइ हुने भएको छ।

सुनुवाइपछि पुनरावलोकनको निस्सा दिने वा नदिने विषयमा इजलासले निर्णय गर्नेछ। निस्सा प्रदान भएमा यस मुद्दाको पुनः विस्तृत सुनुवाइको प्रक्रिया अघि बढ्नेछ भने निस्सा अस्वीकृत भएमा यसअघिको आदेश यथावत् रहनेछ।

यस मुद्दाको सुनुवाइ र त्यसपछिको निर्णयलाई नेपाली कांग्रेसको आधिकारिकता विवादसँग जोडिएको महत्त्वपूर्ण कानुनी प्रक्रियाका रूपमा हेरिएको छ। पूर्ण इजलासको निर्णय आजै आउने सम्भावना रहेको अदालत स्रोतले जनाएको छ।