MBM कलेजमा शनिबारदेखि दुईदिवसीय ‘ह्याकफेस्ट–२०२६’

काठमाडौँ ।

अनामनगरस्थित मदन भण्डारी मेमोरियल कलेज (एमबिएमसी)ले शनिबारदेखि दुईदिवसीय आन्तरिक ह्याकाथन ‘एमबिएमसी ह्याकफेस्ट–२०२६’ आयोजना गर्ने भएको छ ।

‘सोच्नुहोस्, नवप्रवर्तन गर्नुहोस् र निर्माण गर्नुहोस्’ भन्ने नाराका साथ आयोजना हुने ह्याकाथनमा नवप्रवर्तन तथा प्रविधिका विभिन्न विषयमा विद्यार्थीहरूले आफ्ना सिर्जनात्मक सोच र परियोजना प्रस्तुत गर्नेछन् । कार्यक्रमको उद्घाटन शनिबार बिहान कलेजको सभाहलमा हुनेछ भने आइतबार समापन गरिने कलेजले जनाएको छ ।

शनिबार दर्ता, औपचारिक स्वागत समारोह, राष्ट्रिय गान, पञ्चदीप प्रज्वलन तथा प्रमुख अतिथिको मन्तव्यपछि नियमावली र आचारसंहिताबारे जानकारी दिँदै ह्याकाथन औपचारिक रूपमा सुरु हुनेछ । पहिलो दिन प्रतियोगीहरूले चारवटा विकास सत्रमा रहेर आफ्ना परियोजनामा काम गर्नेछन् ।

त्यस्तै, दोस्रो दिन बिहान थप दुईवटा विकास सत्र सञ्चालन हुनेछन् । त्यसपछि निर्णायक मूल्यांकनअघि प्रस्तुतीकरणको तयारी तथा अन्तिम मार्गदर्शनका लागि विशेष मेन्टरिङ सत्र सञ्चालन गरिनेछ । दिउँसो दुई चरणमा निर्णायक मूल्यांकन हुनेछ ।

मूल्यांकनपछि मेन्टर तथा निर्णायकहरूलाई मायाको चिनो प्रदान गरिनेछ । त्यसपछि विजेता घोषणा, चेक तथा प्रमाणपत्र वितरण र समापन मन्तव्यसँगै कार्यक्रम सम्पन्न हुनेछ ।

आन्तरिक ह्याकाथनका रूपमा आयोजना हुने ‘एमबिएमसी ह्याकफेस्ट–२०२६’मा कलेजका विभिन्न शैक्षिक कार्यक्रमअन्तर्गत अध्ययनरत विद्यार्थीहरूको सहभागिता रहनेछ ।