रामकुमारी झाँक्रीसहित राष्ट्रियसभामा एमालेका ६ उम्मेदवार तय

काठमाडौं । नेकपा एमालेले राष्ट्रियसभा सदस्य निर्वाचनका लागि ६ जना उम्मेदवारको नाम टुंगो लगाएको छ । १८ सदस्यका लागि हुने निर्वाचनमा एमालेले विभिन्न प्रदेशबाट उम्मेदवार छनोट गरेको हो ।

एमालेले नेतृ रामकुमारी झाँक्रीलाई लुम्बिनी प्रदेशबाट उम्मेदवार बनाउने निर्णय गरेको छ । यस्तै, कोशी प्रदेशबाट रोशनी मेचे, बागमतीबाट डा. प्रेमकुमार दङ्गाल, गण्डकीबाट सम्झना देवकोटा, कर्णालीबाट मिनासिंह रखाल र सुदूरपश्चिमबाट लीलाकुमारी भण्डारी उम्मेदवार चयन भएका छन् ।

आगामी माघ ११ गते हुने निर्वाचनका लागि आज मनोनयन दर्ता हुँदैछ । यद्यपि, दलहरूबीच सिट बाँडफाँटको अन्तिम सहमति भने अझै हुन सकेको छैन ।

नेपाली कांग्रेस, नेकपा एमाले, नेपाली कम्युनिस्ट पार्टी (नेकपा) र जनता समाजवादी पार्टी (जसपा) नेपालबीच ७–७, ३ र १ सिटको भागबन्डा गर्ने प्रयास भए पनि सहमति जुट्न सकेको छैन । सोही सम्भावित समझदारीका आधारमा एमालेले उम्मेदवार छनोट गरेको बताइएको छ । मधेश प्रदेशका लागि भने एमालेले उम्मेदवार टुंगो लगाइसकेको छैन।