मन्त्री पदबाट बाहिरिएपछि कुलमान घिसिङ राजनीतिक मैदानमा

काठमाडौँ । मन्त्री पदबाट राजीनामा दिएका कुलमान घिसिङले पदमा रहँदा देश र जनतालाई केन्द्रमा राखेर इमान्दार प्रयासका साथ काम गरेको बताएका छन् ।

बुधबार साँझ राजीनामापछि मन्त्रालयमा आयोजित पत्रकार सम्मेलनमा घिसिङले छोटो समयमै भए पनि महत्वपूर्ण नीतिगत सुधारको बलियो आधार तयार भएको दाबी गरे । “सरकार कागजमै सीमित रहेन, मैदानमै देखियो,” उनले भने ।

राजीनामा जिम्मेवारीबाट पन्छिन नभई आत्मसम्मान, नैतिकता र जनताप्रतिको प्रतिबद्धताको निरन्तरता भएको स्पष्ट पार्दै घिसिङले पदबाहिर रहेर पनि देशको पक्षमा उभिने प्रतिबद्धता व्यक्त गरे ।

उज्यालो नेपाल पार्टी र राष्ट्रिय स्वतन्त्र पार्टीबीच भएको सहमतिमा आफ्नो नाम उल्लेख भए पनि त्यो औपचारिक रूपमा कार्यान्वयन नभएको उनको भनाइ छ । आफू कुनै पनि राजनीतिक दलको सदस्य नरहेको र राजीनामापछि आफ्ना मान्छे नियुक्त गर्न दबाब दिएको भन्ने आरोप भ्रामक रहेको घिसिङले स्पष्ट पारे ।

उज्यालो नेपाल पार्टीका संरक्षकसमेत रहेका घिसिङले आजदेखि आफ्नो सक्रिय राजनीतिक जीवन सुरु हुने घोषणा गर्दै मुलुकमा व्याप्त बेथितीविरुद्ध आवाज उठाउने बताए।