एक लाख ३३ हजार ९८० निर्वाचन प्रहरीका लागि भर्ना खुल्यो

काठमाडौँ । नेपाल प्रहरीले प्रतिनिधिसभा सदस्य निर्वाचनका लागि १ लाख ३३ हजार ९८० जना निर्वाचन प्रहरी भर्ना गर्ने भएको छ। नेपाल प्रहरी प्रधान कार्यालय, मानवस्रोत विकास विभागअन्तर्गत भर्ना छनोट शाखाले बिहीबार सूचना प्रकाशित गर्दै योग्यता पुगेका नेपाली नागरिकबाट दरखास्त आह्वान गरेको हो।

सूचनाअनुसार निर्वाचन प्रहरी पदका लागि खुला प्रतिस्पर्धाबाट भर्ना गरिनेछ। इच्छुक उम्मेदवारले २०८२ पुस २५ गतेदेखि माघ १ गतेसम्म तोकिएका जिल्ला प्रहरी कार्यालय तथा काठमाडौँ उपत्यकाका जिल्ला प्रहरी परिसर (काठमाडौँ, ललितपुर र भक्तपुर) मा दरखास्त दिन सक्नेछन्। दरखास्त बुझाउने समय बिहान १० बजेदेखि दिउँसो ४ बजेसम्म तोकिएको छ।

निर्वाचन प्रहरीमा भर्ना हुन उम्मेदवार नेपाली नागरिक हुनुका साथै सामान्य लेखपढ गर्न जान्ने, नैतिक पतन देखिने कुनै फौजदारी अभियोगमा सजाय नपाएको, कुनै राजनीतिक दलको सदस्य नभएको र शारीरिक तथा मानसिक रूपमा स्वस्थ हुनुपर्नेछ। उमेर हद दरखास्त दिने अन्तिम मितिसम्म १८ वर्ष पूरा भई ४५ वर्ष ननाघेको हुनुपर्ने व्यवस्था गरिएको छ।

शारीरिक मापदण्डअनुसार पुरुष उम्मेदवारको न्यूनतम उचाइ ५ फिट र तौल कम्तीमा ५० केजी तथा महिलाको हकमा न्यूनतम उचाइ ४ फिट र तौल कम्तीमा ४२ केजी तोकिएको छ। महिलाको हकमा गर्भवती नभएको हुनुपर्ने शर्तसमेत राखिएको छ।

भर्ना छनोट प्रक्रियाअन्तर्गत शारीरिक तन्दुरुस्ती, स्वास्थ्य परीक्षण र आवश्यक अन्य परीक्षणहरू सञ्चालन गरिनेछ। छनोटमा नेपाल सेना, नेपाल प्रहरी, सशस्त्र प्रहरी बल तथा अन्य सुरक्षा निकायमा पूर्वसेवा गरेका वा सन्तोषजनक रूपमा निर्वाचन सुरक्षामा काम गरेको अनुभव भएका व्यक्तिलाई प्राथमिकता दिइने जनाइएको छ।

निर्वाचन प्रहरीको नियुक्ति अवधि अधिकतम ४० दिन रहनेछ। सेवा सुविधाअन्तर्गत निर्वाचन प्रहरीलाई नेपाल प्रहरी जवानको प्रारम्भिक तलब स्केलअनुसार प्रतिदिन ८६९ रुपैयाँ ४० पैसाका दरले अधिकतम ४० दिनका लागि ३४ हजार ७७६ रुपैयाँ पारिश्रमिक उपलब्ध गराइनेछ। साथै खाना खर्च, पोशाक भत्ता, तालिम खर्च र यातायात खर्चसमेत प्रदान गरिनेछ। सबै भुक्तानी सम्बन्धित व्यक्तिको बैंक खातामार्फत गरिने व्यवस्था गरिएको छ।

नेपाल प्रहरीले निष्पक्ष, स्वतन्त्र र भयरहित निर्वाचन सम्पन्न गर्न आवश्यक जनशक्ति व्यवस्थापनका लागि निर्वाचन प्रहरी भर्ना गरिएको जनाएको छ। विस्तृत जानकारी सम्बन्धित जिल्ला प्रहरी कार्यालयबाट प्राप्त गर्न सकिने सूचनामा उल्लेख छ।