गगनको दाबी : १० लाखमध्ये ९ लाख ८० हजार सदस्य हामीसँग छन्

काठमाडौं । नेपाली कांग्रेसको विशेष महाधिवेशनबाट सभापति चयन भएका गगन थापाले पार्टीका अधिकांश क्रियाशील सदस्य विशेष महाधिवेशनको पक्षमा उभिएको दाबी गरेका छन् ।

निर्वाचन आयोगले चाहे सदस्यहरूको वास्तविक अवस्था परीक्षण गरेर हेर्न सक्ने भन्दै उनले कांग्रेसका करिब १० लाख क्रियाशील सदस्यमध्ये ९ लाख ८० हजार आफूहरूको पक्षमा रहेको बताएका हुन् ।

सभापति चयनपछि भृकुटीमण्डपमा उपस्थित महाधिवेशन प्रतिनिधिलाई सम्बोधन गर्दै थापाले विशेष महाधिवेशन नै पार्टी विधानले व्यवस्था गरेको सबैभन्दा ठूलो संरचना भएको स्पष्ट पारे । पार्टी सदस्यहरू कता उभिएका छन् भन्ने विषय निर्णायक हुने उल्लेख गर्दै उनले भने,“पुराना र नयाँ गरी करिब १० लाख क्रियाशील सदस्य छन् । निर्वाचन आयोगले हेर्न चाहेको दिन नेपाली कांग्रेसले आह्वान गर्दा १० लाखमध्ये ९ लाख ८० हजार सदस्य एक ठाउँमा उभिएनन् भने त्यसबेला प्रश्न उठाऔंला ।”

थापाले निर्वाचन आयोगले कानुन, पार्टी विधान र विशेष महाधिवेशनको उपस्थितिलाई आधार मानेर निष्पक्ष निर्णय गर्नेमा आफू विश्वस्त रहेको बताए ।

“हाम्रो संविधानले चिनेको निर्वाचन आयोग कुनै पनि अवैध शक्तिको प्रभावमा पर्दैन भन्ने विश्वास हामीलाई छ,” उनले भने, “आयोगले प्रचलित कानुन, विधान र यहाँको उपस्थितिलाई आधार मानेर निर्णय गर्छ ।”
यसैबीच, सभापति निर्वाचित भएपछि सञ्चारकर्मीसँग प्रतिक्रिया दिँदै थापाले नेपाली कांग्रेस विभाजित नभएको दाबी गरे ।

यसअघि शेरबहादुर देउवालाई सभापति निर्वाचित गर्ने महाधिवेशन प्रतिनिधिहरूले नै आफूलाई पनि सभापति चुनेको उनको भनाइ थियो । विशेष महाधिवेशन सम्पन्न भइसकेको र केही दिनमै नयाँ कार्य समिति आउने विषयमा निर्वाचन आयोगलाई लिखित जानकारी दिइसकिएको पनि उनले बताए ।

थापाले कांग्रेसको आधिकारिकताबारे कुनै अन्योल नरहने दाबी गर्दै निर्वाचन आयोगले विधि र विधानअनुसार निर्णय गर्ने विश्वास व्यक्त गरे ।
“निर्वाचन आयोग जानकार छ र कानुनसम्मत निर्णय गर्छ,” उनले भने, “त्यसैले कांग्रेसको वैधानिकतामाथि कुनै विवाद रहँदैन ।”

विशेष महाधिवेशनपछि पार्टीभित्रको नेतृत्व र वैधानिकताबारे उठेका प्रश्नहरूको जवाफ दिँदै थापाले संगठनात्मक शक्ति र सदस्यहरूको समर्थन नै आफ्नो मुख्य आधार भएको स्पष्ट पारे ।