आयोग परिसरमा दुवै कांग्रेस समूहको नाराबाजी, सुरक्षा सतर्कता उच्च

काठमाडौं । नेपाली कांग्रेसका दुवै समूहले निर्वाचन आयोग परिसरमा नाराबाजी गरेका छन् । पार्टीभित्रको विवाद उत्कर्षमा पुगेसँगै आयोगमा दुवै पक्षका कार्यकर्ता भेला भएर आ–आफ्नो मागसहित नाराबाजीमा उत्रिएका हुन् ।

नाराबाजीका क्रममा स्थिति तनावग्रस्त बन्न सक्ने आशंकामा आयोग परिसर र आसपास क्षेत्रमा सुरक्षा व्यवस्था कडा पारिएको छ । नेपाल प्रहरी र सशस्त्र प्रहरीको बाक्लो उपस्थिति देखिएको छ भने सम्भावित झडप रोक्न सुरक्षाकर्मीलाई सतर्क अवस्थामा राखिएको छ ।

एक पक्षले पार्टी विधानअनुसारको निर्णयको माग गर्दै प्रदर्शन गरेको छ भने अर्को पक्षले आयोगले निष्पक्ष र कानुनी ढंगले निर्णय गर्नुपर्ने दबाब दिएको छ । दुवै समूहबीच आरोप–प्रत्यारोप चलिरहेको छ ।

हालसम्म कुनै अप्रिय घटना भने नभएको सुरक्षा स्रोतले जनाएको छ । आयोगले अवस्था नियालिरहेको र शान्तिपूर्ण वातावरण कायम गर्न सबै पक्षलाई संयमता अपनाउन आग्रह गरेको छ ।