आईजीपी कार्कीको शब्दमा ‘आमा म त खरानीबाट उठेर आएँ’ सार्वजनिक

काठमाडौं । प्रहरी महानिरीक्षक दानबहादुर कार्कीको शब्द रचना रहेको गीत ‘आमा म त खरानीबाट उठेर आएँ’ सार्वजनिक गरिएको छ । नेपाल प्रहरी प्रधान कार्यालयमा शुक्रबार आयोजित विशेष कार्यक्रमबीच उक्त गीतको प्रथम प्रदर्शनी गरिएको हो ।

नेपाल प्रहरीले निर्वाह गर्दै आएको जिम्मेवारी, संघर्ष र सेवाभावलाई गीतमार्फत जीवन्त रूपमा प्रस्तुत गरिएको छ । गीतमा प्रहरी कर्मचारीहरूले दिनानुदिन भोग्दै आएको संघर्ष, जोखिमपूर्ण जिम्मेवारी तथा आम नागरिकको सुरक्षाका लागि गरिएको निश्वार्थ सेवाको यथार्थ चित्रण गरिएको छ ।

गीतकार कार्की उपत्यका प्रहरी कार्यालयको प्रमुखको जिम्मेवारीमा रहँदा नवयुवा पुस्ताले गरेको आन्दोलनका क्रममा प्रत्यक्ष अवलोकन र अनुभूत गरेका घटनालाई यस गीतमा समेटिएको छ । नवयुवा आन्दोलनपश्चात् खरानीबाट उठेर पुनः नागरिक सेवा र सुरक्षामा समर्पित प्रहरीको मनोभाव, अनुशासन, देशप्रतिको जिम्मेवारी र आम नागरिकप्रतिको कर्तव्यबोधलाई गीतले भावनात्मक रूपमा उजागर गरेको छ ।

गीतमा दिपक शर्माको संगीत, उदय राज पौडेलको एरेन्ज, श्याम श्वेत रसाइलीको मिक्सिङ तथा मास्टरिङ रहेको छ ।
गायक थानेश्वर गौतम, शान्ति श्री परियार, समिर खरेल, सदिच्छा कट्टेल र सहिमा श्रेष्ठले गीतमा स्वर दिएका छन् ।

गीतको भिडियोमा सुरक्षा पन्त, सुर्यमाला खनाल, तारा केसी, राजन न्यौपाने, सुदिप पट्टेल, कृतिका बस्नेत लगायत कलाकारहरूको अभिनय रहेको छ । मानव सुवेदीको कथा तथा निर्देशन रहेको भिडियोमा सौरभ लामिछानेको छायांकन र सरोज ओलीको भिडियो कन्सेप्ट रहेको छ ।

गीतको प्रदर्शनी कार्यक्रममा प्रहरी अतिरिक्त महानिरीक्षक, प्रहरी नायब महानिरीक्षक, वरिष्ठ प्रहरी अधिकृतहरूका साथै प्रहरी अधिकृत र जवानहरूको उल्लेख्य उपस्थिति रहेको थियो ।