माधव नेपालको उम्मेदवारीविरुद्ध निर्वाचन आयोगमा उजुरी

काठमाडौं । नेपाली कम्युनिस्ट पार्टीका सहसंयोजक माधव नेपालको उम्मेदवारीविरुद्ध निर्वाचन आयोगमा उजुरी परेको छ। रौतहट–१ बाट उम्मेदवारी दर्ता गरेका नेपालविरुद्ध सोही क्षेत्रका उम्मेदवार राम नरेश राय यादवले उम्मेदवारी खारेजको माग गर्दै उजुरी दिएका हुन्।

उजुरीमा पतञ्जलि जग्गा प्रकरणमा माधव नेपाल मुछिएको र उक्त मुद्दा हाल विचाराधीन अवस्थामा रहेको उल्लेख गरिएको छ। अख्तियार दुरुपयोग अनुसन्धान आयोग ऐन २०४८ को दफा १७ तथा भ्रष्टाचार निवारण ऐन २०५९ को दफा ३३ बमोजिम नेपाल निलम्बनमा परेकाले प्रतिनिधिसभा सदस्य निर्वाचन ऐन २०७४ अनुसार उम्मेदवार हुन अयोग्य रहेको दाबी उजुरीमा गरिएको छ।

उजुरीमा भनिएको छ, “अख्तियार दुरुपयोग अनुसन्धान आयोग ऐन २०४८ को दफा १७ तथा भ्रष्टाचार निवारण ऐन २०५९ को दफा ३३ बमोजिम निज निलम्बन भएको तथा मुद्दा विचाराधीन अवस्थामा रहेकाले प्रतिनिधिसभा सदस्य निर्वाचन ऐन २०७४ र अख्तियार दुरुपयोग अनुसन्धान आयोग ऐन २०४८ अनुसार उहाँ उम्मेदवार हुन अयोग्य हुनुहुन्छ। त्यसैले उहाँको उम्मेदवारी खारेज गरी पाउन सादर अनुरोध छ।”

निर्वाचन आयोगले उजुरीमाथि आवश्यक कानुनी प्रक्रिया अघि बढाउने जनाएको छ।