डेउडा र छलियाले ततायो राजधानीको क्याम्पस,जोशीको अध्यक्षतामा विद्यार्थी समाजको नयाँ कार्यसमिति गठन

काठमाडौं स्थित नेशनल कलेज अफ इन्जिनियरिङमा सुदूरपश्चिमेली कला, संस्कृति र संगीतको भव्य झलक देखिएको छ। कलेजको सुदूरपश्चिम विद्यार्थी समाजले आयोजना गरेको सांस्कृतिक कार्यक्रममा सुदूरपश्चिमका चर्चित कलाकारहरूले दर्शकलाई भरपूर मनोरञ्जन प्रदान गरेका छन्।

कार्यक्रममा बरिष्ठ डेउडा गायक नन्द कृष्ण जोशी, लोक गायक जनक महरा, भरत भट्ट, कल्पना मल्ल लगायतका कलाकारहरूले डेउडा गीत र छलिया प्रस्तुत गर्दै क्याम्पसलाई सांगीतिक माहोलमा परिणत गरेका थिए। कलाकारहरूको दमदार प्रस्तुतीसँगै विद्यार्थीहरू नाच्दै, गाइरहेका र सुदूरपश्चिमेली संस्कृतिमा रमाइरहेका देखिन्थे।

कार्यक्रम केवल मनोरञ्जनमा सीमित रहेन, यसै अवसरमा सुदूरपश्चिम विद्यार्थी समाजको नयाँ कार्यसमिति पनि गठन गरिएको छ। ज्ञान देव जोशीको अध्यक्षतामा नयाँ समिति चयन गरिएको हो। समितिको सचिवमा रिसभ जोसी तथा कोषाध्यक्षमा अन्जना खत्री रहेका छन् ।

आयोजकका अनुसार यस्ता कार्यक्रमले सुदूरपश्चिमको कला, संस्कृति र पहिचानलाई राजधानीमा प्रवर्द्धन गर्नुका साथै विद्यार्थीहरूबीच आपसी सद्भाव र एकताको भावना बढाउने विश्वास लिइएको छ।

सांस्कृतिक उत्साह, कलाकारको शानदार प्रस्तुति र संगठनात्मक गतिविधिको संगम बनेको यस कार्यक्रमले सहभागी सबैको मन जित्न सफल भएको छ।