रास्वपा सभापति लामिछाने र राप्रपा अध्यक्ष लिङ्देनबीच भेटवार्ता

काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछाने र राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनबीच भेटवार्ता भएको छ। बिहीबार बिहान राप्रपा अध्यक्ष लिङ्देन, रवि लामिछाने निवास पुगेर भेटवार्ता गरेका हुन्।

भेटमा पछिल्लो राजनीतिक अवस्था र फागुन २१ गते हुने प्रतिनिधिसभा निर्वाचनलगायत विषयमा छलफल भएको राप्रपा प्रवक्ता मोहन श्रेष्ठले जानकारी दिएका छन्। उनले सामाजिक सञ्जालमार्फत ‘चुनावबारे संवाद सुरु भएको’ संकेत गरेका छन्।

यसअघि अध्यक्ष लिङ्देनले नेपाली कांग्रेसका सभापति शेरबहादुर देउवा र नेकपा एमालेका अध्यक्ष केपी शर्मा ओलीसँग पनि भेटवार्ता गरेका थिए। राप्रपाले पुस २७ गते पृथ्वी जयन्तीको अवसरमा आयोजना गर्ने चियापान कार्यक्रममा निम्तो दिन विभिन्न दलका शीर्ष नेतासँग भेटघाट गरिरहेको जनाएको छ।