रास्वपा सचिवालय बैठक आज, १० महत्वपूर्ण कार्यसूचीमा छलफल हुने

काठमाडौं । राष्ट्रिय स्वतन्त्र पार्टी (रास्वपा) सचिवालयको बैठक आज दिउँसो २ बजे बस्दै छ। पार्टी प्रवक्ता मनिष झाका अनुसार बैठकमा १० वटा महत्वपूर्ण एजेन्डामा छलफल हुनेछ।

बैठकको मुख्य एजेन्डा प्रत्यक्षतर्फ उम्मेदवारी दिने अन्तिम मितिको घोषणा हो। यसअघि रास्वपाले प्रत्यक्ष उम्मेदवार बन्न इच्छुक व्यक्तिहरूबाट आवेदन मागिसकेको छ। बैठकले त्यसका लागि आवेदन दिने मिति तय गर्नेछ।

त्यस्तै, बैठकले दुई उपसमितिको विस्तार र पुनर्संरचना, पार्टी केन्द्रीय समिति विस्तार, निर्वाचन परिचालन समिति गठन, समानुपातिक उम्मेदवार परिचालन कार्यविधि तय, निर्वाचन स्रोत व्यवस्थापन कार्यविधि निर्माण जस्ता विषयमा निर्णय गर्ने अपेक्षा गरिएको छ।

गत आइतबार बसेको केन्द्रीय समिति बैठकमा काठमाडौं महानगरपालिकाका मेयर बालेन शाह समूहबाट २६ जना र विवेकशील साझा पार्टीबाट ७ जनालाई समितिमा मनोनित गरिएको थियो। आजको बैठकले यसलाई थप सुदृढ पार्ने सम्भावना छ।

साथै, बैठकमा प्रदेश र जिल्ला स्तरमा पार्टी प्रवेश कार्यक्रम सञ्चालन तथा स्थानीय तहमा उम्मेदवार क्लब गठन गर्ने विषयमा पनि छलफल हुनेछ। पार्टीले आगामी निर्वाचन लक्षित गर्दै संगठनात्मक संरचना र उम्मेदवारी प्रक्रियालाई मजबुत बनाउने रणनीति अघि बढाउनेछ।