विशेष महाधिवेशनबाट निर्वाचित पदाधिकारीसहित गगन थापा निर्वाचन आयोगमा

काठमाडौं । नेपाली कांग्रेसका सभापति गगन थापासहित विशेष महाधिवेशनबाट निर्वाचित सम्पूर्ण पदाधिकारी निर्वाचन आयोग पुगेका छन् ।

विशेष महाधिवेशनमार्फत पार्टी नेतृत्व परिवर्तन भएको निर्णय अद्यावधिक गराउन सभापति थापाको नेतृत्वमा पदाधिकारीहरूको टोली निर्वाचन आयोग पुगेको हो । आयोगमा आवश्यक कागजात बुझाउँदै नयाँ नेतृत्वको वैधानिकता दर्ता गराउने प्रक्रिया अघि बढाइएको जनाइएको छ ।

यसअघि केही बेरअघि बसेको केन्द्रीय समिति बैठकले निर्वाचन आयोग जाने औपचारिक निर्णय गरेको थियो । सोही निर्णयअनुसार सभापति थापासहितको टोली आयोग पुगेको हो ।

यद्यपि, पार्टीका अर्काे पक्ष शेरबहादुर देउवा समूहले भने विशेष महाधिवेशन नै नरहेको दाबी गर्दै हिजै निर्वाचन आयोगमा पत्र पठाइसकेको छ । देउवा पक्षको उक्त पत्रपछि कांग्रेसको आधिकारिकताबारे आयोगले गर्ने निर्णयलाई चासोका साथ हेरिएको छ ।

विशेष महाधिवेशनपछि पार्टी नेतृत्व, वैधानिकता र आधिकारिकताको विषयमा देखिएको विवाद अब निर्वाचन आयोगको निर्णयमा केन्द्रित भएको छ ।