झापा–५ बाट बालेनको उम्मेदवारी दर्ता, ओलीसँग सीधा प्रतिस्पर्धा

काठमाडौँ। राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाह (बालेन)ले प्रतिनिधिसभा निर्वाचनका लागि झापा–५ बाट उम्मेदवारी दर्ता गराएका छन्। योसँगै बालेन औपचारिक रूपमा संसदीय चुनावी राजनीतिमा प्रवेश गरेका छन्।

यो बालेनको पहिलो प्रतिनिधिसभा निर्वाचन हो। काठमाडौं महानगरपालिकाका प्रमुख पदबाट राजीनामा दिएर उनी राष्ट्रिय राजनीतिमा होमिएका हुन्। रास्वपाले बालेनलाई भावी प्रधानमन्त्रीको उम्मेदवारका रूपमा प्रस्तुत गर्दै चुनावी मैदानमा उतारेको छ।

झापा–५ मा बालेनको मुख्य प्रतिस्पर्धा पूर्वप्रधानमन्त्री तथा नेकपा एमालेका अध्यक्ष केपी शर्मा ओलीसँग हुने भएको छ। यद्यपि ओलीको उम्मेदवारी दर्ता भने अझै हुन बाँकी छ। ओली यस क्षेत्रबाट पटक–पटक निर्वाचित भइसकेका प्रभावशाली नेता मानिन्छन्।

यस निर्वाचन क्षेत्रमा अन्य दलका उम्मेदवारहरू पनि मैदानमा छन्। नेकपाबाट रञ्जित तामाङ र श्रम संस्कृति पार्टीबाट समीर तामाङ उम्मेदवार रहेका छन्। तर ओली र तामाङद्वयको उम्मेदवारी दर्ता प्रक्रिया भने हालसम्म पूरा भइसकेको छैन।

काठमाडौं महानगरपालिकामा मेयरका रूपमा गरेका कामका कारण बालेनले युवा मतदाता र परिवर्तन चाहने वर्गको ध्यान आकर्षित गरेका छन्। उनको उम्मेदवारीसँगै झापा–५ को चुनावी प्रतिस्पर्धा थप रोचक बनेको राजनीतिक विश्लेषकहरूको भनाइ छ।

अब झापा–५ मा स्थापित राजनीतिक शक्तिहरू र नयाँ राजनीतिक धारबीचको टक्करले निर्वाचन परिणामलाई कुन दिशामा लैजान्छ भन्ने चासो बढेको छ। यसको अन्तिम निर्णय आगामी निर्वाचनले गर्नेछ।