नवराजपुर गाउँपालिकाद्वारा प्रहरीलाई लागुऔषध परीक्षण कीट हस्तान्तरण

सिरहा, ६ मङ्सिरः
लागुऔषध दुव्र्यसन नियन्त्रणमा सहयोग गर्ने उद्देश्यसहित यहाँको नवराजपुर गाउँपालिकाले प्रहरीलाई १२० थान लागुऔषध परीक्षण कीट हस्तान्तरण गरेको छ । आज नवराजपुरमा आयोजित कार्यक्रममा गाउँपालिका अध्यक्ष शिवउदगार यादवले प्रमुख जिल्ला अधिकारी सुरेन्द्र पौडेलमार्फत सुरक्षा निकायलाई कीट हस्तान्तरण गर्नुभएको हो ।

कीट हस्तान्तरण गर्दै अध्यक्ष यादवले समुदायमा लागुऔषध दुव्र्यसन चुनौतीपूर्ण बनेको उल्लेख गर्दै यसको नियन्त्रण तथा रोकथामका लागि सबैले सहयोग गर्नुपर्ने बताउनुभयो । उहाँले भन्नुभयो, “लागुऔषधले व्यक्ति मात्र नभई परिवार र समाजलाई समेत तहसनहस बनाइदिन्छ । त्यसको दलदलमा युवाहरू फस्दै गएका छन् । यसलाई रोक्न सबै पक्ष एकताबद्ध हुन आवश्यक छ ।”

परीक्षण कीट ग्रहण गर्दै प्रमुख जिल्ला अधिकारी पौडेलले गाउँपालिकाको पहलले जिल्लामा दुव्र्यसन नियन्त्रणको अभियानलाई थप गति दिने विश्वास व्यक्त गर्नुभयो । “परीक्षण तथा निगरानी प्रणाली मजबुत भएपछि अनुगमन, सचेतना र कानुन कार्यान्वयन झनै प्रभावकारी बन्छ”, उहाँले भन्नुभयो । जिल्ला प्रहरी कार्यालयका प्रमुख प्रहरी उपरीक्षक अनन्तराम शर्माले कीटको प्रयोगले लागुऔषध प्रयोगकर्ता पहिचान गर्न सहज हुने बताउनुभयो ।

उहाँले यस्ता कीटको नियमित प्रयोगले जिल्लामा दुव्र्यसनको दर घटाउन मद्दत पुग्ने विश्वास व्यक्त गर्नुभयो । दक्षिण सीमावर्ती क्षेत्रमा गाउँपालिकाले परीक्षण कीट उपलब्ध गराएपछि अब गाउँभित्र लागुऔषध सेवन तथा अवैध कारोबार नियन्त्रणमा सहज हुने अपेक्षा गरिएको छ ।