भेनेजुएलामा अमेरिकी आक्रमणविरुद्ध नेपालले दियो ४ दिनपछि प्रतिक्रिया

काठमाडौं । अमेरिकाले भेनेजुएलामा सैन्य कारबाही गरी राष्ट्रपति निकोलस मदुरोलाई नियन्त्रणमा लिएपछि नेपाल सरकारले चार दिनपछि आधिकारिक प्रतिक्रिया जनाएको छ।

गत जनवरी ३ तारिख राति अमेरिकी सेनाले भेनेजुएलास्थित राष्ट्रपति निवासमै आक्रमण गरी राष्ट्रपति मदुरो र उनकी पत्नीलाई अपहरण शैलीमा अमेरिका पुर्‍याएको घटनाप्रति बुधबार साँझ परराष्ट्र मन्त्रालयले विज्ञप्ति जारी गर्दै चासो व्यक्त गरेको हो।

विज्ञप्तिमा नेपालले सम्बन्धित सबै पक्षलाई अधिकतम संयम अपनाउन र तनाव बढाउने कुनै पनि गतिविधि नगर्न आह्वान गरेको छ। साथै संयुक्त राष्ट्रसंघको बडापत्रमा उल्लिखित सार्वभौमसत्ता, क्षेत्रीय अखण्डता र राजनीतिक स्वतन्त्रताको सिद्धान्तको पूर्ण सम्मान हुनुपर्नेमा जोड दिइएको छ।

परराष्ट्र मन्त्रालयले भेनेजुएला प्रकरणलाई नजिकबाट नियालिरहेको उल्लेख गर्दै संवाद, कूटनीति र पारस्परिक समझदारीमार्फत विवाद शान्तिपूर्ण रूपमा समाधान गर्नुपर्ने धारणा व्यक्त गरेको छ।

अमेरिकाले लागुऔषध तथा हतियार तस्करीको आरोप लगाउँदै राष्ट्रपति मदुरो दम्पतीविरुद्ध न्युयोर्कस्थित अदालतमा मुद्दा दायर गरेको छ। हिरासतमा रहेका उनीहरूलाई गत सोमबार अदालतमा उपस्थित गराइएको थियो। पहिलो सुनुवाइका क्रममा मदुरोले आफू निर्दोष रहेको र आफूलाई अपहरण गरिएको बयान दिएका छन्।

एक सार्वभौम राष्ट्रका राष्ट्रपतिविरुद्ध अमेरिकाले गरेको यस कारबाहीले विश्व राजनीतिमा तरंग ल्याएको छ। घटनाप्रति विश्वका विभिन्न मुलुकहरूले प्रतिक्रिया जनाइरहेका छन्।