एमालेको गम्भीर आरोप: “सरकारले निषेधाज्ञा र कर्फ्यु लगाएर मतदातामा त्रास फैलायो, यो लोकतन्त्रमाथिको प्रहार हो”

नेकपा (एमाले) ले आगामी फागुन २१ गते हुने प्रतिनिधिसभा निर्वाचनको मुखमा सरकारले देशका विभिन्न भागमा निषेधाज्ञा र कर्फ्यु लगाएर मतदातामा डर पैदा गरेको आरोप लगाएको छ।

मंगलबार आयोजित पत्रकार सम्मेलनमा एमाले प्रचार विभाग प्रमुख मीनबहादुर शाहीले शान्ति सुरक्षाको बहानामा जारी गरिएको कर्फ्यु सरकारको कमजोरी भएको र यसले स्वतन्त्र मतदानको अधिकार कुण्ठित गरेको बताउनुभयो। विशेषगरी मधेस–तराईका जिल्लाहरूमा लगाइएको प्रतिबन्धले नागरिकको अभिव्यक्ति स्वतन्त्रतामा अङ्कुश लगाएको र निर्वाचन सार्ने भ्रामक हल्लाप्रति एमालेले गम्भीर ध्यानाकर्षण गराउँदै घोषित समयमै चुनाव हुनुपर्ने अडान दोहोर्‍याएको छ।

एमालेले आफूलाई स्थायित्व र समृद्धिको आधारका रूपमा प्रस्तुत गर्दै यसपटक ‘भोट फर चेन्ज’ होइन, ‘भोट फर नेशन’ (राष्ट्रका लागि मतदान) को नयाँ नारा समेत अघि सारेको छ।