प्रतिनिधिसभा सदस्य निर्वाचनका लागि कञ्चनपुरका सीमा नाका ७२ घण्टा बन्द गरिने

प्रतिनिधिसभा सदस्य निर्वाचनलाई स्वच्छ, निष्पक्ष र भयमुक्त वातावरणमा सम्पन्न गराउन कञ्चनपुर जिल्लासँग जोडिएका नेपाल-भारत सीमा नाकाहरू बन्द गरिने भएको छ।

जिल्ला प्रशासन कार्यालय कञ्चनपुरका अनुसार आगामी फागुन २१ गते हुने निर्वाचनलाई लक्षित गरी फागुन १८ गते सोमबार राति १२ बजेदेखि फागुन २१ गते बिहीबार राति १२ बजेसम्मका लागि सम्पूर्ण सीमा नाकाहरू सिल गर्ने निर्णय गरिएको हो। साथै, फागुन २० गते राति १२ बजेदेखि मतदान कार्य नसकिएसम्मका लागि अत्यावश्यक सेवा (एम्बुलेन्स, दमकल, अस्पताल, कूटनीतिक नियोग आदि) र अनुमति प्राप्त सवारीसाधन बाहेकका अन्य सम्पूर्ण यातायात सञ्चालनमा समेत रोक लगाइएको छ।

निर्वाचनलाई शान्तिपूर्ण र मर्यादित बनाउन यस्तो व्यवस्था गरिएको सहायक प्रमुख जिल्ला अधिकारी मोहनचन्द्र जोशीले जानकारी दिनुभयो।