समानुपातिक बन्दसूचीमा ‘मनपरी’, सडकमा महिलाहरूको खबरदारी

काठमाडौं । समानुपातिक समावेशी अधिकारलाई राजनीतिक दाउपेचको विषय बनाएर कमजोर पार्न खोजिएको भन्दै शुक्रबार राजधानीका सडकमा महिलाहरूले खबरदारी गरेका छन् ।

समानुपातिक उम्मेदवार छनोटमा नेता र राजनीतिक दलहरूले मनपरी गरेको भन्दै महिला अधिकारकर्मीहरूले विरोध प्रदर्शन गरेका हुन् ।

‘महिला अधिकारका लागि दबाब अभियान’ अन्तर्गत माइतीघर मण्डलाबाट सुरु भएको विरोध र्‍याली बबरमहल पुगेर कोणसभामा परिणत भएको हो।

राजनीतिक वृत्तमा देखिएका कतिपय अभ्यासले समावेशीताको मर्ममाथि प्रहार गर्न खोजेको निष्कर्षसहित विभिन्न क्षेत्र र पृष्ठभूमिका महिलाहरू एकताबद्ध भई सडकमा ओर्लिएका हुन् ।

उनीहरूले समानता, सामाजिक न्याय र समावेशीताको ग्यारेन्टी नभएसम्म लोकतन्त्र बलियो नहुने जिकिर गरे ।

साथै, समाजमा व्याप्त दण्डहीनताको अन्त्य गर्दै विधिको शासन कायम गर्नुपर्ने मागसहितका नाराहरूले उनीहरुले लगाएका थिए ।

सहभागीहरूले हात–हातमा बोकेका प्लेकार्डमा संविधानप्रदत्त अधिकारको रक्षा र कार्यान्वयनको पक्षमा जोडदार आवाज उठाइएको छ ।