हिमाचल आगलागी :९ नेपाली सम्पर्कविहीन, ३ जनाको मृत्यु

सोलन । हिमाचल प्रदेशको सोलन जिल्लाको अर्की बजारमा शनिबार राति भीषण आगलागी भएको छ। स्थानीय समय अनुसार राति २ ३० बजेदेखि आगो फैलिन थालेको थियो। आगोले पसल, घर तथा आसपासका संरचनाहरू व्यापक रूपमा नष्ट गरेको छ।

दमकल र स्थानीय सुरक्षा टोलीले आगो निभाउन प्रयास गरिरहेका छन्। आगो फैलिनुमा विद्युत् सर्टसर्किट र ग्यास सिलिन्डर विस्फोटको सम्भावना रहेको बताइएको छ।
उक्त घटनामा ३ जनाको मृत्यु भएको पुष्टि भएको छ, जसमा ८ वर्षको बच्चा पनि रहेका छन्। त्यस्तै २ जना घाइते भएका छन् उनीहरुको स्थानीय अस्पतालमा उपचार भइरहेको छ।

प्रारम्भिक जानकारी अनुसार ९ नेपाली नागरिक सम्पर्कविहीन छन्। प्रहरीले र प्रशासनले तीमध्ये कम्तिमा ६ नेपालीहरू अझै मलबेभित्र फसेको अनुमान लगाएको छ। सम्पर्कविहीन नेपालीहरू नेपालका सल्यान जिल्लाका नागरिकहरू हुन्।

स्थानीय दमकल र प्रशासनको टोलीले उद्धार कार्यलाई तीव्र बनाएको छ। मलबा हटाउने र सम्पर्कविहीन व्यक्तिहरूलाई खोज्ने प्रयास जारी छ। नेपाली दूतावासले पनि सहयोगका लागि स्थानीय प्रशासनसँग समन्वय गरिरहेको छ।

आगोले लगभग १०–१५ घर र पसल नष्ट भएको छ। आगोका कारण बस्तु, संरचना र सामानमा ठूलो नोक्सानी भएको छ। प्रशासनले प्रभावित परिवारलाई तत्काल राहत उपलब्ध गराउने तयारी गरिरहेको छ।

स्थानीय प्रशासन र उद्धार टोलीले नागरिकहरूलाई सतर्क रहन र सुरक्षित ठाउँमा बस्न आग्रह गरेको छ। घटनास्थलमा खोजी–उद्धार कार्य निरन्तर जारी रहेको छ।