आज फ्रान्सेली भाषा दिवस

काठमाडौँ, ६ चैतः आज फ्रान्सेली भाषा दिवस हो । बहुभाषिकता तथा सांस्कृतिक विविधतालाई प्रोत्साहन गर्ने उद्देश्यले संयुक्त राष्ट्रसङ्घको आह्वानमा हरेक वर्ष २० मार्चमा यो दिवस मनाइन्छ । संयुक्त राष्ट्रसङ्घले सन् २०१० देखि हरेक वर्ष अरेबिक, चिनियाँ, अङ्ग्रेजी, फ्रान्सेली, रुसी र स्पेनी भाषा दिवस मनाउँदै आएको छ । भाषा दिवसका माध्यमबाट प्रत्येक भाषाको इतिहास, संस्कृति र प्रयोगबारे चेतना बढाउन अवसर प्रदान गर्ने संयुक्त राष्ट्रसङ्घले जनाएको छ । उक्त विश्व संस्थाका अनुसार अङ्ग्रेजी, म्यान्डारिन र स्पेनीपछि फ्रान्सेली भाषा विश्वमा सबैभन्दा बढी बोलिने चौथो भाषा हो । यो भाषा ३९ करोड ६० लाख मानिसले बोल्ने गरेका छन्भने संसारमा सबैभन्दा बढी सिकाइने दोस्रो विदेशी भाषा पनि हो । हाल करिब १७ करोड विद्यार्थीले यो भाषा सिकिरहेका छन् । फ्रान्सेली बोल्नेहरूको ६५ प्रतिशत हिस्सा अफ्रिकामा छ ।