एनपिएल: आज दुई खेल हुने

काठमाडौं,१८ मंसिर: राजधानीमा जारी दाेस्राे संस्करणको नेपाल प्रिमियर लिग (एनपिएल) मा आज दुई खेल हुने भएका छन्।

त्रिभुवन विश्वविद्यालय अन्तर्राष्ट्रिय क्रिकेट रंगशाला,कीर्तिपुरमा बिहान ११:४५ बजे हुने पहिलाे खेलमा पाेखरा एभेन्जर्स र काठमाडौं भिड्दा अपरान्ह ४ बजे हुने दाेस्राे हुने खेलमा सुदूरपश्चिम राेयल्स र चितवन राइनाेज प्रतिस्पर्धा गर्नेछन्।

पाँच खेलबाट चार अंक मात्रै जाेडेकाे पाेखरालाई प्लेअफकाे सम्भावना जीवित राख्न जित्नै पर्ने दबाब छ।

काठमाडौंले भने छ खेलबाट आठ अंक जाेडेकाे छ। लिग चरणको अन्तिम खेलमा जित निकालेर काठमाडौं प्लेअफमा सुरक्षित हुन चाहन्छ ।

अपरान्ह हुने दाेस्राे खेलमा प्लेअफमा पुगिसकेको सुदूरपश्चिम र प्लेअफकाे बाटाेमा रहेकाे चितवन आमनेसामने हुनेछन्।

सुदूरपश्चिमले अपराजित रहेर १० अंकका साथ शिर्ष स्थानमा छ। आजकाे खेल जितेर सुदूरपश्चिम पहिलाे क्वालिफायरमा स्थान सुरक्षित गर्न चाहन्छ।

पाँच खेलबाट चार अंक जाेडेकाे चितवनलाई प्लेअफ आशाका लागि आजकाे खेलमा विजयी हुनैपर्ने बाध्यता छ।
मंसिर १ गतेदेखि सुरू भएको प्रतियोगितामा आठ टाेली सहभागी छन्।