टि–२० विश्वकपको ट्रफी शीतलनिवासमा सार्वजनिक

काठमाडौं । आईसीसी पुरुष टी–२० विश्वकप २०२६ ट्रफी नेपाल ल्याइएको छ । सोमबार आइपुगेको टी–२० विश्वकप २०२६ ट्रफी टुर नेपालमा सुरु गरिएको छ ।

सोमबार (पुस २१) राष्ट्रपति भवन शीतलनिवासमा राष्ट्रपति रामचन्द्र पौडेलले ट्रफीलाई सार्वजनिक गरेका हुन् । राष्ट्रपति पौडेलसँगै नेपाल क्रिकेट संघ (क्यान) का अध्यक्ष चतुरबहादुर चन्द र नेपाली राष्ट्रिय टोलीका कप्तान रोहितकुमार पौडेलले संयुक्त रुपमा ट्रफी प्रदर्शनी गरेका थिए।

क्यानका अनुसार यही पुस २१ देखि २३ गतेसम्म नेपाल ट्रफी टुर हुनेछ । भारत र श्रीलंकामा आगामी माघ २४ देखि सुरु हुने विश्वकपअघि भारत र श्रीलंकासहित कतार, ओमान, नेपाल, बहराइन र मङ्गोलियामा टी–२० विश्वकपको ट्रफी लैजाने कार्यक्रम छ ।

२० टिमले भाग लिने टी–२० विश्वकपको १०औँ संस्करणमा सन् २०२६ फेब्रुअरी ७ देखि मार्च ८ सम्म हुनेछ। समूह ‘सी’ मा रहेको नेपालले आफ्नो समूहका इंग्ल्यान्ड, वेस्ट इन्डिज, बंगलादेश र इटालीसँग खेल्ने छ ।