रविविरुद्धको मुद्दा फिर्ता लिने कदमप्रति रक्षा बमको आपत्ति

काठमाडौं । जेन–जी आन्दोलनकी अभियन्ता रक्षा बमले राष्ट्रिय स्वतन्त्र पार्टीका सभापति रवि लामिछानेविरुद्ध लागेको संगठित अपराध र सम्पत्ति शुद्धीकरणसम्बन्धी मुद्दा फिर्ता लिने महान्यायाधिवक्ता कार्यालयको कदमप्रति गम्भीर असहमति जनाएकी छन् ।

सामाजिक सञ्जाल फेसबुकमा स्टाटस लेख्दै बमले कानुनले फिर्ता लिन नमिल्ने मुद्दा सरकार आफैंले फिर्ता लिने तयारी गर्नु सुशासनको ठाडो उपहास भएको टिप्पणी गरेकी छन् । उनले सम्पत्ति शुद्धीकरणको मुद्दा कानुनले नै ‘नेगेटिभ सूची’मा राखेको विषय स्मरण गराउँदै सरकारको नियतमाथि प्रश्न उठाएकी छन् ।

उनको स्टाटसमा उल्लेख छ,‘कानुनमा फिर्ता लिन नमिल्ने मुद्दाको ‘नेगेटिभ सूची’ नै राखिएको छ । सम्पत्ति शुद्धीकरणको मुद्दा त्यही ‘नेगेटिभ सूची’मा पर्छ ।’

बमले चेतनशील नागरिक, लोकतन्त्रका लागि सडकमा उत्रिएका युवाहरू र सुशासनको माग गर्दै बलिदान दिन तयार पुस्ताको आवाजलाई बेवास्ता गरिएको भन्दै कडा शब्दमा असन्तोष व्यक्त गरेकी छन् ।‘चेतनशीलहरूले प्रश्न गर्लान्, सडकमा सुशासनका निम्ति गोली खाएका कलिला छातीहरूले सोध्लान्— महान्यायाधिवक्ता ज्यू ! यही हो सुशासन ???’ उनले लेखेकी छन् ।