बालेन आज पहिलो पटक घण्टीघर प्रवेश गर्दै

काठमाडौँ । काठमाडौँ महानगरपालिकाका मेयर बालेन्द्र शाह ‘बालेन’ आज पहिलो पटक राष्ट्रिय स्वतन्त्र पार्टी (रास्वपा) को केन्द्रीय कार्यालय ‘घण्टीघर’ प्रवेश गर्ने भएका छन्।

रास्वपामा वरिष्ठ नेताका रूपमा चयन भएका मेयर शाहलाई आज पार्टी केन्द्रीय कार्यालयमा औपचारिक स्वागत गरिने भएको छ । उनी दिउँसो २ बजे बस्न लागेको केन्द्रीय समितिको बैठकमा भाग लिन पहिलो पटक घण्टीघरमा प्रवेश गर्न लागेका हुन् ।

उक्त बैठकमा भाग लिएपछि रास्वपा सभापति रवि लामिछाने र बालेन्द्रसहितका नेताहरू साँझ ५ बजे मधेश प्रदेशको राजधानी जनकपुर पुग्दैछन् ।

त्यहाँबाट रवि र बालेन्द्रले चुनावी प्रचार अभियान थाल्ने भएका छन् । बालेन्द्र झापा ५ र रवि चितवन २ बाट फागुन २१ गतेको चुनाव लड्ने तयारीमा छन् ।

गत पुस १३ गते रास्वपामा प्रवेश गरेका बालेन्द्र त्यसयता घण्टीघरमा पुगेका छैनन् । आफ्ना २६ जना सहयोगीलाई रास्वपामा प्रवेश गराइसकेका उनी घण्टीघरमा पुगेर औपचारिक रुपमा दलीय राजनीतिमा लाग्ने भएका छन् ।

तर उनले काठमाडौंको मेयरबाट राजीनामा दिने नदिने केही खुलेको छैन । सम्भवतस् उनले मेयर पदबाट राजीनामा नदिई झापा या काठमाडौंमा मंगलबार उम्मेदवारी मनोनयन गर्ने भएका छन् ।