टी २० विश्वकप अन्तरगत आफ्नो दोस्रो खेलमा आज नेपाल इटलीविरुद्ध भिड्दै

काठमाडौं । टी २० विश्वकप अन्तरगत आफ्नो दोस्रो खेलमा आज नेपाल इटलीविरुद्ध भिड्दैछ । अन्तर्राष्ट्रिय क्रिकेटमा नेपाल र इटली पहिलोपटक प्रतिस्पर्धा गर्न लागेका हुन् ।इटलीको यो डेब्यू विश्वकप हो भने नेपाल तेस्रोपटक टी २० विश्वकप खेल्दैछ । अघिल्लो टी २० विश्वकपमा जितविहिन रहेको नेपाल यसपटक भने खाली हात फर्किन चाहँदैन ।

नेपालको समूहमा सबैभन्दा कमजोर आँकिएको प्रतिद्वन्द्वी इटली हो । त्यसैले आजको खेलमा नेपालले निश्चित जितसहित दुई अंक बटुल्ने आशा राखेको छ । यदि हारको सामना गर्नु परेमा त्यो एउटा ‘सेटब्याक’ हुनेछ ।टी २० विश्व वरीयतामा नेपाल १६औँ स्थानमा छ भने इटली २६ औँ स्थानमा । वरीयतामा तल रहे पनि इटलीलाई कम आँक्ने सुविधा भने नेपालसँग् छैन ।

यूरोप क्षेत्रीय छनोटमा स्कटल्याण्डलाई हराएर इटलीले विश्वकपमा स्थान बनाएको हो । इटलीको टीममा अष्ट्रेलिया, साउथ अफ्रिका, ईंग्ल्यान्ड, श्रीलंका, पाकिस्तानजस्ता टेस्ट राष्ट्रका खेलाडीहरू छन् । इटलीका कप्तान वेन म्याडेसन साउथ अफ्रिकाका खेलाडी हुन् । यद्यपि, आजको म्याचमा उनी चोटका कारण अनुपस्थित रहने छन् ।