निरुताको कमाण्डमा नेपालको राष्ट्रिय खेल

काठ्माण्डौँ ।

दार्चुलाकी प्रतिभावान खेलाडी निरुता ठगुन्ना नेपाली राष्ट्रिय महिला भलिबल टोलीको कप्तान बनेकी छन् । संघर्ष, आत्मविश्वास र निरन्तर मेहनतको बलमा राष्ट्रिय टोलीको नेतृत्वसम्म पुगेकी निरुता अहिले नेपाली भलिबलकी प्रेरणादायी खेलाडीका रूपमा स्थापित भएकी छन् ।

दार्चुलाको नौगाड गाउँपालिका–६ धुलिगाडामा जन्मिएकी निरुताले विद्यालयस्तरीय प्रतियोगिताबाट भलिबल यात्रा सुरु गरेकी हुन् । दुर्गममा जन्मिएर राष्ट्रिय टोलीको कप्तान बन्नु उनका लागि मात्र होइन, सिंगो सुदूरपश्चिमकै गौरवको विषय बनेको छ ।

५ फिट ५ इन्च उचाइ भए पनि निरुताको शक्तिशाली स्पाइक, आत्मविश्वासी खेलशैली र अद्भुत ऊर्जा विपक्षी टोलीका लागि ठूलो चुनौती बन्ने गरेको छ । आउटसाइड हिटरका रूपमा स्थापित उनले खेलमा देखाउने आक्रामकता र नेतृत्व क्षमताले नेपाली टोलीलाई नयाँ उचाइमा पुर्‍याएको छ ।

सन् २०१९ मा राष्ट्रिय टोलीबाट डेब्यु गरेकी निरुताले नेपाललाई एभीसी सेन्ट्रल जोनको उपाधि जिताउन महत्वपूर्ण भूमिका खेलेकी थिइन् । त्यस्तै दक्षिण एसियाली खेलकुद (साग) मा रजत पदक तथा काभा प्रतियोगिताहरूमा नेपालको ऐतिहासिक सफलतामा पनि उनको योगदान अविस्मरणीय छ ।

घरेलु तथा अन्तर्राष्ट्रिय प्रतियोगितामा निरन्तर उत्कृष्ट प्रदर्शन गर्दै आएकी निरुता अहिले नेपाली महिला भलिबलको भरोसायोग्य अनुहार बनेकी छन् । कप्तानको जिम्मेवारीसँगै अब उनको काँधमा नेपाली भलिबललाई अझ ठूलो सफलता दिलाउने चुनौती र अवसर दुवै थपिएको छ ।

निरुताको कप्तानीमा नेपाली टोलीले नयाँ इतिहास रच्ने अपेक्षा गरिएको छ ।