विश्वकप क्रिकेटको खेल तालिका सार्वजनिक,नेपालका सबै खेल मुम्बईमा हुने

काठमाडौं,१०मंसिर: सन् २०२६ मा हुने आईसीसी टी–२० विश्वकपको खेल तालिका सार्वजनिक भएको छ । अन्तर्राष्ट्रिय क्रिकेट परिषद् (आईसीसी)ले सहभागी २० टोलीलाई चार समूहमा विभाजन गर्दै तालिका सार्वजनिक गरेको हो ।

भारत र श्रीलंकामा हुने विश्वकप फेब्रुअरी ७ देखि मार्च ८ सम्म सञ्चालन हुनेछ ।
सार्वजनिक तालिकाअनुसार नेपाल समूह सी मा रहेको छ । नेपालका सबै खेल भारतको मुम्बईमा राखिएको छ ।

नेपालको समूहमा वेस्ट इन्डिज, इङ्ल्यान्ड, बंगलादेश र इटाली छन् । वेस्ट इन्डिज र इङ्ल्यान्ड दुवै दुईदुई पटकका विश्वविजेता समेत हुन् ।
नेपालको पहिलो खेल फेब्रुअरी ८ मा मुम्बईस्थित वान्खडे स्टेडियममा इंग्ल्यान्डसँग हुनेछ ।

यस्तै नेपालको दोस्रो खेल फेब्रुअरी १२ मा इटाली, तेस्रो फेब्रुअरी १५ मा वेस्ट इन्डिज र चौथो फेब्रुअरी १७ मा बंगलादेशसँग हुनेछ ।

नेपाल क्रिकेट संघ क्यानका अध्यक्ष चतुरबहादुर चन्दले केही हप्ता अगाडी आइसीसी अध्यक्ष जय शाहलाई भारतको नयाँदिल्लीमा भेट गरेर नेपालका खेलहरु भारतमा राखिदिन आग्रह समेत गर्नुभएको थियो । उक्त आग्रहलाई स्वीकार गर्दै नेपालका सबै खेल भारतमा राखिएका अध्यक्ष चन्दले बताउनुभयो ।

यस्तै नेपाल तेस्रोपटक विश्वकपमा सहभागी हुँदैछ । यसअघि नेपालले सन् २०१४ र २०२४ मा विश्वकप खेलेको थियो ।