भेनेजुएलाको अन्तरिम राष्ट्रपति बनिन् डेल्सी

अदालतले देशको सम्प्रभुता जोगाउने सन्दर्भमा उपराष्ट्रपतिले प्रशासनिक नेतृत्व गरेर जानुपर्ने आदेश दिएको हो । संवैधानिक प्रक्रियाअनुसार उपराष्ट्रपति डेल्सी रोड्रिगेजले कार्यवाहक रूपमा देशको नेतृत्व सम्हालेकी छन् । लामो समयदेखि मदुरो प्रशासनको सबैभन्दा विश्वासपात्र र शक्तिशाली व्यक्तित्व मानिने रोड्रिगेज अहिले भेनेजुएलाको राजनीतिक केन्द्रमा उभिएकी छन् ।

५५ वर्षीया डेल्सी एलोइना रोड्रिगेज गोमेज भेनेजुएलाको सत्तारूढ वामपन्थी आन्दोलनकी अनुभवी नेतृ हुन् । उनी पूर्व राष्ट्रपति ह्युगो चाभेजको बोलिभेरियन क्रान्तिबाट उदाएकी नेतृमध्ये एक हुन्। पेशाले वकिल रोड्रिगेजले अन्तर्राष्ट्रिय सम्बन्ध र मानवअधिकार क्षेत्रमा अध्ययन गरेकी छन् । उनका बुबा सन् १९७० को बेला कम्युनिस्ट छापामार थिए ।

उनले २०१४ देखि २०१७ सम्म भेनेजुएलाको विदेश मन्त्री रहेकी उनले अमेरिका र युरोपेली संघको कडा आलोचना गर्दै भेनेजुएलामाथि लगाइएका प्रतिबन्धविरुद्ध अन्तर्राष्ट्रिय मञ्चहरूमा आक्रामक कूटनीति अपनाइन् । सन् २०१८ मा उनलाई उपराष्ट्रपति नियुक्त गरिएको थियो ।

उनका दाजु जर्ज रोड्रिगेज पनि भेनेजुएलाको सत्तारूढ संरचनामा प्रभावशाली नेता हुन् र राष्ट्रिय सभाका अध्यक्ष रहिसकेका छन्। यसले रोड्रिगेज परिवारलाई सत्ताको केन्द्रमा राखेको विश्लेषकहरू बताउँछन् ।