मादुरो अपदस्थपछि भेनेजुएलामा अमेरिकी हस्तक्षेप

काठमाडौँ ।  भेनेजुएलामा नाटकीय राजनीतिक घटनाक्रम विकसित भएको छ। राष्ट्रपति निकोलस मादुरोलाई सत्ताबाट हटाई अमेरिका लगिएपछि देशमा अमेरिकी हस्तक्षेप सुरु भएको दाबी गरिएको छ।

अमेरिकी राष्ट्रपति डोनाल्ड ट्रम्पले संयुक्त राज्य अमेरिकाले अस्थायी रूपमा भेनेजुएलाको प्रशासनमा सहयोग गर्ने र देशको विशाल तेल पूर्वाधार सुधार गरी अन्तर्राष्ट्रिय बजारमा तेल निर्यात गर्ने योजना बनाएको बताएका छन्। शनिबार पत्रकारहरूसँग कुरा गर्दै ट्रम्पले नेतृत्वको शून्यताबाट देशलाई स्थायित्वतर्फ लैजान अमेरिकाले भूमिका खेल्ने दाबी गरे।

अमेरिकी अधिकारीहरूका अनुसार मादुरोलाई ‘नार्को–आतङ्कवाद’ षड्यन्त्रमा संलग्न भएको आरोपमा पक्राउ गरी न्युयोर्क लगिएको हो। उनलाई संघीय हिरासतमा राखेर मुद्दा चलाउने तयारी भइरहेको जनाइएको छ। ह्वाइट हाउसले सार्वजनिक गरेको भिडियोमा मादुरो अमेरिकी लागूऔषध नियन्त्रण प्रशासनका एजेन्टहरूसँग देखिएका छन्।

यस घटनाप्रति भेनेजुएलाकी उपराष्ट्रपति डेल्सी रोड्रिग्जले कडा आपत्ति जनाएकी छन्। उनले मादुरोलाई तत्काल रिहा गर्न माग गर्दै निकोलस मादुरो नै भेनेजुएलाका एक मात्र वैध राष्ट्रपति भएको बताएकी छन्। राज्य टेलिभिजनमार्फत सम्बोधन गर्दै उनले आफू सत्ता लिन इच्छुक नरहेको स्पष्ट पारिन्।

यसबीच राजधानी काराकासमा विस्फोटको आवाज सुनिनुका साथै सैन्य विमानहरू उडेको देखिएको छ। भेनेजुएलाको सरकारले यसलाई ‘साम्राज्यवादी आक्रमण’ भनेको छ। आक्रमण करिब आधा घण्टा चलेको र केही नागरिक तथा सुरक्षाकर्मी मारिएको दाबी गरिएको छ, यद्यपि आधिकारिक संख्या सार्वजनिक गरिएको छैन।

मदुरो पक्राउ परेपछि केही स्थानमा उनका समर्थकहरूले विरोध प्रदर्शन गरेका छन् भने अन्य क्षेत्रहरूमा तनाव र त्रासको वातावरण देखिएको छ। विद्युत् अवरुद्ध भएका क्षेत्रमा जनजीवन प्रभावित भएको बताइएको छ।

अन्तर्राष्ट्रिय रूपमा पनि यस घटनाले गम्भीर चासो जन्माएको छ। संयुक्त राष्ट्रसङ्घीय सुरक्षा परिषद्मा आपतकालीन बैठक बोलाउने तयारी भइरहेको छ। उता, अमेरिकी कङ्ग्रेसका केही सांसदहरूले कङ्ग्रेसको स्वीकृति बिना गरिएको सैन्य कारबाहीको कानूनी वैधतामाथि प्रश्न उठाएका छन्।

भेनेजुएलाको अवस्था थप जटिल बन्दै जाँदा आगामी दिनमा क्षेत्रीय र अन्तर्राष्ट्रिय राजनीतिमा यसको प्रभाव गहिरो हुने अनुमान गरिएको छ।