प्रहरीकाे २६ कराेडकाे उपकरण र साढे ४ सय बढी सवारी साधन नष्ट

काठमाडाैं । जेनजी युवा पुस्ताकाे आन्दोलनका क्रममा आफना ३ जना जवान गुमाएको नेपाल प्रहरीको भौतिक संरचनामा पनि उतिकै क्षति भएको छ ।

जवानको लत्ता-कपडादेखि हतियारसम्म लुटिने र जलाउने भएपछि प्रहरीको दैनिक कामनै प्रभावित भइरहेको हाे । देशैभरी करिब २ सय कार्यालय पूर्णरुपमा क्षति व्यहोरोको नेपाल प्रहरीलाई आगामी निर्वाचनका लागि स्रोत साधनसहित सरकारले कसरी तयार पार्छ भन्ने अन्यौलता कायमै छ । प्रहरीले भने आफूलाई लयमा फर्काउने प्रयास गरिरहेको छ ।

गत भदौ २३ र २४ गतेको जेनजी युवाकाे आन्दोलनले नेपाल प्रहरीको भौतिक मात्रै होइन मनोबल पनि उत्तिकै कमजोर बनाएको छ । आगो लगाइएका केही प्रहरी कार्यालय स्थानीयले नै पुर्ननिर्माण गरिदिएका छन् । भदाै २४ गते भएको आन्दोलनका क्रममा नेपाल प्रहरीले भौतिक र स्रोत साधनमा समेत प्रहरीले ठूलो क्षति व्यहोरोको छ । प्रहरी प्रधान कार्यालयले आफ्नो क्षति विवरण संकलन गरिरहेको छ । देशैभरी भएको आन्दोलनका क्रममा १ सय ९७ भवन पूर्ण रुपमा क्षतिग्रस्त भएको छ । जसमा सबै भन्दा बढी काठमाडौं उपत्यकाभित्र मात्रै १ सय ५ वटा प्रहरी भवन काम नलाग्ने गरी ध्वस्त भएका छन् ।

त्यस्तै, मधेश प्रदेशका ३० र कोशी प्रदेशमा २७ वटा प्रहरीका भवनहरु क्षतिग्रस्त भएका हुन् । देशैभरी आएको आन्दोलनमा नेपाल प्रहरीको ४ सय ७० सवारी साधनमा पूर्ण रुपमा क्षति पुगेको तथ्यांक छ । प्रहरीको ४५ वटा हेभि सवारी साधन जलेर नष्ट हुनुका साथै १ सय ७७ वटा लाइट सवारी साधन समेत जलेका छन् । प्रहरीले बोक्ने सुरक्षा साधनमा पनि ठूलो क्षति भएको प्रहरीको तथ्यांक छ । एक्सरे मेसिन, मेटल डिक्टेटर र सिसिक्यामेरासहितका स्रोत साधान मात्रै २६ करोड १ लाख रुपैंयाको नष्ट भएको प्रहरीले जनाएको हाे ।

प्रहरीको लामो र छोटो दुरीमा प्रहार गर्ने १२ सय ७६ वटा हतियार लुटिएको अथवा आगजनीमा जलेका छन् । त्यसमा कति लुटियो कति जलेर नष्ट भयो भन्ने एकिन भइसकेको छैन । ९८ हजार ४ सय ७१ राउण्ड गोली १३ सय १५ राउण्ड रबर बुलेट, २ हजार २ सय २० ब्ल्याङ राउण्डर ३२ सय २३ अश्रुग्याँस सेल लुटपाट तथा आगजनी भएको छ । यसको विस्तृत विवरण आउन अझै बाँकी छ । प्रहरीबाट लुटिएका मध्य १ सय ७५ थान हतियार भने बरामद भइसकेको छ ।

प्रहरीले लुटिएका र जलेको हतियार कति भन्ने एकिन गरिसकेको छैन । प्रहरीबाट लुटिएका हतियार नै अबको सुरक्षा चुनौती हुन सक्ने आकंलन गरिसकेको छ । गृह मन्त्रालयले पनि प्रहरीबाट लुटिएका हतियार तथा साधनहरुले यहि असोज महिनाभित्र फिर्ता गर्न भनिसकेको छ । सुरक्षा निकायबाट लुटिएको हतियार फिर्ता नगर्ने विरुद्ध विषेश अप्रेशन चलाउने गृह मन्त्रालयको तयारी छ ।उपत्यका प्रहरी कार्यालयका प्रमुख दानबहादुर कार्कीले हतियार बुझाउनेका लागि खवसर हुने र अटेर गर्नेका विरुद्ध विशेष कारबाही गरिने बताउनुभयाे ।

अहिले प्रहरी जलेका भवन छाडेर अन्य स्थानबाट आफ्नो कर्तव्य निर्वाह गरिरहेको छ । विषेश गरेर चाड पर्वको समयमा आपराधिक समूहले फाइदा उठाउन सक्ने भन्दै हेडक्वाटरले आन्दोलनमा खटिएका भन्दा बाहिरका प्रहरीलाई परिचालन गरिरहेको छ । कतिपय आगो लगाइएका भवनहरु स्थानीयहरुको सहयोगमा बनिरहेको छ भने मर्मत गरेर पनि संचालनमा ल्याइएको हाे । सवारी साधान तथा अन्य उपकरणको पनि तयारी भइरहेको हाे ।

उपत्यका प्रहरी कार्यालयका प्रमुख कार्कीले स्थानीयवासीन्दाले पनि आफ्नाे नजिक प्रहरी आवश्यक परेकाे भन्दै कार्यालय निर्माणमा ठूलाे सहयाेग गरेकाे समेत बताउनुभयाे । स्थानीयवासीन्दालाई आफ्नाे टाेलमा आएका व्यक्तिहरुमाथि निगरानीमा राख्न समेत उहाँले आग्रह गर्नुभएकाे छ। प्रहरी बाहेक विभिन्न सरकारी कार्यालयहरु ३ सय ३० वटा पूर्णरुपमा क्षति पुगेको अहिले सम्मको तथ्यांक छ । निजी व्यवसाय र घरहरु ९७ पूर्ण रुपमा क्षति भएको हाे । सबै गरेर ६ सय ४९ वटा भवनहरु पूर्ण रुपमा क्षति भएको तथ्यांक प्रहरीसँग रहेकाे छ ।

जेनजी आन्दोलनका क्रममा भएको क्षतीको पूर्ण विवरण ल्याउन भने सरकारले अझै गृहकार्य गर्नुपर्ने देखिन्छ ।