चुनाव लड्न मन्त्री पदबाट राजीनामा दिने मनस्थितिमा कुलमान

काठमाडौँ । ऊर्जा, जलस्रोत तथा सिँचाइ, भौतिक पूर्वाधार तथा यातायात तथा शहरी विकास मन्त्रालयका मन्त्री कुलमान घिसिङले चुनाव लड्न मन्त्री पदबाट राजीनामा दिने संकेत गरेका छन् ।

बुधबार मन्त्रालयमा आयोजित पत्रकार सम्मेलनमा बोल्दै उनले यस्तो संकेत गरेका हुन् । उनले भने, ‘जुन बेला हामी चुनावमा जान्छौँ, उम्मेदवारी दर्ता गर्ने समय आउँछ। उपयुक्त समयमा आवश्यक निर्णय गर्छौँ।’

अहिलेको सरकारको मुख्य कार्यभार निर्वाचन नै भएको बताए। चुनावमा सबै नयाँ शक्तिहरू मिलेर जानुपर्छ भन्नेमा रहेको बताए।

उनले भने, ‘आआफ्नो क्षेत्रबाट जुनसुकै परिस्थितिमा योगदान पुर्‍याउनुपर्छ। सबै आफैंमात्रै ठिक भनेर जान हुँदैन। सबै एक भएर जानुपर्छ भन्नेमा एकमत छ। कोको कसरी मिल्ने भन्ने होइन, नयाँ शक्तिहरू सबै मिल्ने हो।’

साथै उनले आज आफ्नो कार्यकालको पहिलो १०० दिनमा सम्पन्न काम, हासिल भएका उपलब्धि र आगामी प्राथमिकतासहितको कार्ययोजना सार्वजनिक गरेका छन् ।

कार्यक्रममा मन्त्री घिसिङले सरकार गठनपछि बहु–मन्त्रालयको जिम्मेवारी सम्हालेको छोटो अवधिमै १०१ वटा महत्वपूर्ण काम सम्पन्न भएको दाबी गरे ।

उनले नेतृत्व लिएको टोलीले संकट व्यवस्थापन, पूर्वाधार सुधार र सेवा प्रवाहलाई प्राथमिकतामा राखेर काम गरेको बताए । ऊर्जामन्त्री कुलमान घिसिङले आफू राजनीतिमा सक्रिय भइसकेको बताएका छन्।