रवि लामिछाने र बालेन शाहबिच ‘निर्णायक’ भेट हुँदै

काठमाडौं । काठमाडौं महानगरपालिकाका मेयर बालेन्द्र शाह (बालेन) र राष्ट्रिय स्वतन्त्र पार्टी (रास्वपा) सभापति रवि लामिछानेबीच सहमति जुटाउने प्रयास निर्णायक चरणमा पुगेको छ । दुवै पक्षका प्रतिनिधिहरूले तयार पारेको सहमतिको मस्यौदा अन्तिम रूप दिँदै आजै निष्कर्ष सार्वजनिक गर्ने तयारी छ ।

बुधबार रास्वपाका केन्द्रीय सदस्य असिम साह, बालेनका निकट कुमार ब्यञ्जनकार र निर्देशक आसिफ साहले सभापति लामिछानेसँग भेटवार्ता गरेका थिए । छलफलपछि सहभागी एक सदस्यले वार्ता सकारात्मक रहेको र सहमति निष्कर्षउन्मुख रहेको बताए । यसअघि तयार पारिएको खाकामा आजै हस्ताक्षर हुने सम्भावनाबारे पनि आन्तरिक छलफल चलिरहेको छ ।

सहमतिको ड्राफ्ट तयार गर्न बनेको कार्यदलमा सुनिल लम्साल, शिशिर खनाल, असिम साह र कुमार ब्यञ्जनकार छन् । बालेन निकट नेताहरूका अनुसार, रास्वपाले बालेनलाई पार्टीको दोस्रो वरीयतामा राख्दै आगामी निर्वाचनमा प्रधानमन्त्रीको उम्मेदवारका रूपमा ‘प्रोजेक्ट’ गर्ने प्रस्तावमा लचकता देखाएको सन्देश पुगेको छ ।

यसअघि भएका वार्तामा बालेनले आउने चुनावमा आफूलाई प्रधानमन्त्रीको उम्मेदवारका रूपमा अघि सार्नुपर्ने शर्त राख्दै आएका थिए । सोमबारको भेटपछि उनका एक सहयोगीले यही बटमलाइन नभए वैकल्पिक राजनीतिक यात्रालाई अगाडि बढाउने तयारी भएको बताएका थिए ।

बुधबार ज्वागलस्थित कुमार ब्यञ्जनकारको निवासमा बालेनले विभिन्न दलका नेतासँग भेटघाट गरेका थिए, जहाँ रास्वपा सभापति लामिछाने र पूर्वप्रधानमन्त्री डा. बाबुराम भट्टराईसँग पनि संवाद भएको थियो । अब दुवै नेताबीच हुने प्रत्यक्ष भेटलाई निर्णायक मानिएको छ । सहमति भएमा बालेन र उनका समर्थक वैकल्पिक तथा ‘जेन–जी’ समूहहरू रास्वपामा समेटिने दाबी गरिएको छ । सहमति नतिजा सार्वजनिक हुनासाथ राजनीतिक वृत्तमा नयाँ समीकरणको तस्वीर स्पष्ट हुने अपेक्षा गरिएको छ।