कोशीमा मन्त्रिपरिषद् पुनर्गठन : कांग्रेस–एमालेका ५/५ नयाँ मन्त्री नियुक्त

विराटनगर । कोशी प्रदेशका मुख्यमन्त्री हिक्मतकुमार कार्कीले मन्त्रिपरिषद् पुनर्गठन गर्दै सबै पुराना मन्त्री हटाएका छन् । कांग्रेस र एमालेका नयाँ अनुहारलाई समेट्दै ८ मन्त्री र २ राज्यमन्त्री नियुक्त गरिएको छ ।

मुख्यमन्त्रीको सिफारिसमा नियुक्त नवनियुक्त मन्त्री तथा राज्यमन्त्रीहरूले प्रदेश प्रमुख पर्शुराम खापुङबाट आजै पद तथा गोपनीयताको शपथ लिएका हुन् ।

नयाँ मन्त्रिपरिषद्मा सत्ता साझेदार दल नेपाली कांग्रेस र नेकपा एमालेबीच समान भागबण्डा गरिएको छ । दुवै दलबाट ४–४ मन्त्री र १–१ राज्यमन्त्री सहभागी छन् ।

मन्त्रीहरूमा प्रदीपकुमार सुनुवार (भौतिक पूर्वाधार), भीम पराजुली (पर्यटन, वन तथा वातावरण), तिलचन पाठक (खानेपानी, सिँचाइ तथा ऊर्जा), इन्द्रमणि पराजुली (आन्तरिक मामिला तथा कानुन), विदुरकुमार लिङ्थेप (आर्थिक मामिला तथा योजना), रामप्रसाद महतो (सामाजिक विकास), मानबहादुर लिम्बू (स्वास्थ्य) र इसाइल मन्सुरी (उद्योग, कृषि तथा सहकारी) छन् ।

त्यसैगरी शोभा चेम्जोङ भौतिक पूर्वाधार विकास राज्यमन्त्री र उमाकान्त गौतम विनाविभागीय राज्यमन्त्री नियुक्त भएका छन् ।