बालेनको कोटामा परेका राजमी राम पनि समानुपातिक दौडबाट बाहिरिए

काठमाडौं । राष्ट्रिय स्वतन्त्र पार्टी (रास्वपा) को समानुपातिकतर्फको बन्दसूचीमा दलित समूहबाट समावेश भएका डा. राजमी रामले आफ्नो नाम स्वेच्छिक रूपमा फिर्ता लिने निर्णय गरेका छन् ।

सामाजिक सञ्जाल फेसबुकमार्फत सार्वजनिक धारणा राख्दै डा. रामले बन्दसूचीमा नाम समावेश हुनु व्यक्तिगत सम्मान मात्र नभई पुस्तौँदेखि आवाजविहीन बनाइएका दलित समुदायका हजारौँ सपनाको प्रतिनिधित्व भएको बताएका छन् ।
‘यो केवल मेरो नाम मात्र थिएन, दलित समुदायको सामूहिक आकांक्षा र पहिचान पनि थियो,’ उनले उल्लेख गरेका छन् ।

तर उनले राजनीतिलाई केवल अवसर प्राप्त गर्ने माध्यमका रूपमा नहेर्ने स्पष्ट पारेका छन् । उनका अनुसार राजनीति त्याग, नैतिक साहस र सही समयमा सही निर्णय गर्ने जिम्मेवारी हो । यही आत्ममूल्यांकनका आधारमा आफूभन्दा अझै बढी पीडित र कम सुनिएका आवाज संसदमा पुग्नुपर्छ भन्ने निष्कर्षमा पुगेको उनले बताएका छन् ।

‘यदि मेरो एक कदम पछाडि हटाइले अरूका लागि ढोका खुल्छ भने, त्यही नै मेरो सबैभन्दा अर्थपूर्ण योगदान हुनेछ,’ डा. रामको भनाइ छ । संसदको कुर्सीमा बसेर मात्र परिवर्तन सम्भव हुन्छ भन्ने मान्यतासँग आफू सहमत नरहेको उल्लेख गर्दै उनले सामाजिक चेतना, नागरिक आन्दोलन र वैचारिक संघर्षका विभिन्न मोर्चाबाट पनि न्यायको लडाइँ लड्न सकिने विश्वास व्यक्त गरेका छन् ।

डा. रामले दलित समुदायको गौरव, आत्मसम्मान र दीर्घकालीन प्रतिनिधित्वलाई केन्द्रमा राख्दै समानुपातिक बन्दसूचीबाट नाम फिर्ता लिने निर्णय गरेको स्पष्ट पारेका छन् । उनका अनुसार यो निर्णय पलायन होइन, जिम्मेवारीको नयाँ सुरुवात हो ।

उनले आगामी दिनमा फरक भूमिकामा रहेर पनि राजनीतिक चिन्तन, दलित अधिकार, अल्पसंख्यकको आवाज, सामाजिक न्याय, लोकतान्त्रिक मूल्य र सुशासनका पक्षमा निरन्तर आवाज उठाइरहने प्रतिबद्धता जनाएका छन् ।‘यो यात्रा यहीँ समाप्त भएको होइन, अझ जिम्मेवार रूपमा सुरु भएको मात्र हो,’ उनले उल्लेख गरेका छन् ।