कर्णाली प्रदेश मन्त्रिपरिषद् बैठकका निर्णय सार्वजनिक

कर्णाली । कर्णाली प्रदेश सरकारले प्रादेशिक अस्पताल नभएका सङ्घीय निर्वाचन क्षेत्रमा एक–एक वटा स्वास्थ्य संस्थाको सेवा सुदृढीकरण कार्यक्रम कार्यान्वयनका लागि सम्बन्धित स्थानीय तहलाई बजेट अख्तियारी प्रदान गर्ने निर्णय गरेको छ।

बुधबार बसेको मन्त्रिपरिषद् बैठकका निर्णय बिहीबार सार्वजनिक गर्दै प्रदेश सरकारका प्रवक्ता तथा भूमि व्यवस्था, कृषि तथा सहकारी मन्त्री विनोदकुमार शाहले सुर्खेतको सालकोट अस्पतालका लागि पञ्चपुरी नगरपालिकालाई १ करोड रुपैयाँ, दुल्लु अस्पतालका लागि दुल्लु नगरपालिकालाई १ करोड रुपैयाँ र कालिकाखेतु प्राथमिक स्वास्थ्य चौकीका लागि हिमा गाउँपालिकालाई १ करोड रुपैयाँ बजेट अख्तियारी प्रदान गर्ने निर्णय भएको जानकारी दिए।

त्यसैगरी, दैलेखस्थित इलाका प्रहरी कार्यालय राकम कर्णालीको अधुरो भवन निर्माणका लागि ६० लाख रुपैयाँ बजेट अख्तियारी प्रदान गर्न सङ्घीय सरकारअन्तर्गत गृह मन्त्रालय र अर्थ मन्त्रालयसँग स्वीकृति माग गर्ने निर्णयसमेत गरिएको उनले बताए ।

प्रवक्ता शाहका अनुसार प्रादेशिक तथा स्थानीय सडक सुधार आयोजना, प्रादेशिक आयोजना व्यवस्थापन एकाइ सुर्खेत र ग्रामीण सडक सञ्जाल सुधार आयोजना, आयोजना कार्यान्वयन एकाइ सुर्खेतको अस्थायी दरबन्दी संरचना स्वीकृत गर्ने निर्णय पनि मन्त्रिपरिषद् बैठकले गरेको छ।