विवाद चुलिएपछि खेलकुद मन्त्री गुप्ताले स्थगित गरे अमेरिका भ्रमण

काठमाडौँ । युवा तथा खेलकुद मन्त्री बब्लु गुप्ताले आगामी माघ ३ गते तय गरिएको अमेरिका भ्रमण स्थगित गरेका छन्।

मन्त्री गुप्ताका स्वकीय सचिव विनोद रिमालका अनुसार, भिसा लगायतका तयारीका लागि पर्याप्त समय नपरेकाले मन्त्री गुप्ताले अहिलेका लागि अमेरिका नजाने निर्णय लिनु परेको हो।

यसअघि मन्त्रिपरिषद्ले अमेरिकामा आयोजना हुने “रोल अफ युथ इन द डेभलपमेन्ट अफ नेपाल पोस्ट जेनजी रिभोलुसन” कार्यक्रममा सहभागी हुन मन्त्री गुप्तालाई स्वीकृति दिएको थियो। कार्यक्रम विकास उप्रेती अध्यक्ष रहेको गैरआवासीय नेपाली संघ ९एनआरएनए०–अमेरिकाले आयोजना गर्न लागेको थियो। तर सतेन्द्र शाह अध्यक्ष रहेको अर्को एनआरएनए–अमेरिकाले मन्त्री गुप्तालाई बोलाएको छैन भन्दै विज्ञप्ति जारी गरेपछि भ्रमण विवादित बनेको थियो।

एनआरएनए–अमेरिकाका तीन समूहमध्ये उप्रेतीको समूहले टेक्सासको डलासमा युवा सम्मेलन आयोजना गर्न लागेको थियो। उप्रेतीका अनुसार सम्मेलन जेनजी आन्दोलनपछि युवाहरूको भूमिकाबारे केन्द्रित हुनेछ। कार्यक्रमको आयोजनामा युवा आशिस संग्रौलाको भूमिका रहेको थियो।

मन्त्री गुप्ताले भ्रमण तालिका पक्का नगरेकाले कार्यक्रमको मिति र स्थान तय नभएको र माघ ६ मा प्रतिनिधिसभा निर्वाचनका लागि मनोनयन दर्ता हुनुपर्ने भएकाले अमेरिका भ्रमण अघि फर्कन चाहेको रिमालले जानकारी दिएका छन्।

रास्वपा, बालेन शाह र कुलमान घिसिङबीचको सहमतिपछि मन्त्री गुप्ता सक्रिय देखिएका थिए। उनले तीन जनासँग फोटोसमेत खिचाएका थिए। यद्यपि प्रधानमन्त्री सुशीला कार्कीले गैरदलीय सरकारमा उनी कुनै पार्टी निकट भएको भन्दै राजीनामा मागेको सार्वजनिक भएको थियो।

स्वकीय सचिव रिमालका अनुसार, अमेरिका भ्रमण तीन साताअघि नै तय भएको थियो। बीचमा मन्त्रिपरिषद् बैठक नबसेकाले स्वीकृति केही दिनअघि मात्र दिइएको थियो। कार्यक्रममा मन्त्री गुप्ताको खर्च अमेरिकाकै आयोजकले व्यहोर्ने व्यवस्था थियो।

भ्रमणमा मन्त्री गुप्ता मात्र सहभागी हुने र अन्य कोही नजाने योजना रहेको रिमालको भनाई थियो ।