सुनसरी–१ मा रोचक प्रतिस्पर्धाको संकेत: किराती र साम्पाङ दुवै मैदानमा

काठमाडौँ । पूर्वमन्त्री तथा प्रगतिशील लोकतान्त्रिक पार्टीका अध्यक्ष परिषद् सदस्य सुदन किराती र धरान उपमहानगरपालिकाका मेयर हर्क साम्पाङबीच आइतबार भेटवार्ता भएको छ।

धरानको रमाइलो चोकस्थित होटल ह्वाइट डोभमा भएको भेटमा देशको वर्तमान राजनीतिक र आर्थिक संकट तथा त्यसको सम्भावित निकासका विषयमा गम्भीर छलफल भएको किरातीले जानकारी दिए।

दुवै नेताले भेटवार्ता सकारात्मक रहेको बताउँदै आगामी दिनमा पनि संवादलाई निरन्तरता दिने सहमति भएको जनाएका छन्।

भेटका क्रममा हर्क साम्पाङ नेतृत्वको श्रम संस्कृति पार्टी र प्रगतिशील लोकतान्त्रिक पार्टीबीच सहकार्यका विषयमा पनि समझदारी बनेको छ। औपचारिक गठबन्धनबारे निर्णय नभए पनि भविष्यमा राजनीतिक सहकार्यको ढोका खुला राख्ने सहमति भएको बुझिएको छ।

यसैबीच, प्रगतिशील लोकतान्त्रिक पार्टीले आगामी प्रतिनिधिसभा निर्वाचनका लागि सुनसरी क्षेत्र नम्बर–१ बाट सुदन किरातीको नाम उम्मेदवारका रूपमा सिफारिस गरिसकेको छ। पार्टीको सुनसरी जिल्ला कार्यसमितिले फागुन २१ गते हुने निर्वाचनका लागि किरातीको नाम केन्द्रमा पठाइसकेको छ।

उता धरानका मेयर हर्क साम्पाङले पनि सुनसरी–१ बाट प्रतिनिधिसभा सदस्यमा उठ्ने तयारी गरिरहेका छन्। सुनसरी–१ धरान उपमहानगरपालिका समेटिएको क्षेत्र हो, जहाँ साम्पाङ हाल मेयरको जिम्मेवारीमा छन्।

२०७९ मंसिरमा सम्पन्न प्रतिनिधिसभा निर्वाचनमा सुदन किराती तत्कालीन नेकपा (माओवादी केन्द्र) का तर्फबाट भोजपुरबाट निर्वाचित भएका थिए। माओवादी केन्द्र विभिन्न वाम दलसँग एकीकृत भई नेकपा बनेपछि जनार्दन शर्मासँगै अलग भएका किराती हाल नवगठित प्रगतिशील लोकतान्त्रिक पार्टीमा आबद्ध छन्।

सुनसरी–१ मा दुवै प्रभावशाली नेताको सम्भावित उम्मेदवारीले आगामी निर्वाचनलाई रोचक र प्रतिस्पर्धात्मक बनाउने संकेत देखिएको छ।