बालेन शाहले माघ ४ गते पदबाट राजीनामा दिने

काठमाडौं । काठमाडौं महानगरपालिकाका मेयर बालेन शाहले आगामी माघ ४ गते पदबाट राजीनामा दिने तयारी गरेका छन् । आगामी प्रतिनिधिसभा निर्वाचनमा उम्मेदवार बन्ने उद्देश्यसहित उनले मेयर पदबाट अलग हुने निर्णय गरेका हुन् ।

निर्वाचन आयोगको कार्यतालिकाअनुसार माघ ६ गते प्रतिनिधिसभा निर्वाचनको प्रत्यक्षतर्फ उम्मेदवारी दर्ता हुने छ । कानुनी व्यवस्था अनुसार उम्मेदवारी दिनुअघि कार्यकारी पदमा रहेका व्यक्तिले पदबाट राजीनामा दिनुपर्ने भएकाले शाहले दुई दिनअगावै राजीनामा दिन लागेका हुन् ।

स्रोतका अनुसार माघ ४ गते उनले औपचारिक रूपमा काठमाडौं महानगरपालिकाको मेयर पदबाट राजीनामा दिनेछन् । त्यसपछि माघ ५ गते राष्ट्रिय स्वतन्त्र पार्टी (रास्वपा) को केन्द्रीय कार्यालय घण्टीघर पुग्ने उनको कार्यतालिका तय भएको छ । उक्त भेटघाटलाई आगामी राजनीतिक यात्राको औपचारिक सुरुवातका रूपमा हेरिएको छ ।

रास्वपाको कार्यालय पुगेपछि शाह मधेश प्रदेशतर्फ जाने तयारीमा रहेको बताइएको छ । मधेशसहित देशका विभिन्न जिल्लामा उनले राजनीतिक भेटघाट र जनसम्पर्क अभियानलाई तीव्र बनाउने उनी निकटस्थहरूले बताएका छन् । पछिल्लो समय बालेन शाहको मधेश क्षेत्रमा सक्रियता बढ्दै गएको र त्यहाँका स्थानीय नेताहरूसँग निरन्तर संवाद भइरहेको जनाइएको छ ।

मेयर शाहले रास्वपासँग सहकार्य गर्दै अघि बढ्ने र आफूलाई प्रधानमन्त्रीको उम्मेदवारका रूपमा प्रस्तुत गर्दै निर्वाचनमा जाने विषयमा सहमति भएको स्रोतको दाबी छ । यद्यपि, यसबारे रास्वपाले औपचारिक घोषणा भने गरिसकेको छैन ।

२०७९ सालको स्थानीय तह निर्वाचनमा स्वतन्त्र उम्मेदवारका रूपमा काठमाडौं महानगरको मेयर निर्वाचित भएका बालेन शाहले शहरी व्यवस्थापन, अवैध संरचना हटाउने अभियान, सुशासन र डिजिटल सुधारका विषयमा आक्रामक कदम चालेका थिए । उनको कार्यशैलीलाई लिएर समर्थक र आलोचक दुवै रहेका छन् ।

अब मेयर पदबाट राजीनामा दिएसँगै बालेन शाह राष्ट्रिय राजनीतिमा औपचारिक प्रवेश गर्ने तयारीमा देखिएका छन् । उनको यो निर्णयले आगामी निर्वाचनको राजनीतिक समीकरणमा कस्तो प्रभाव पार्नेछ भन्ने विषयलाई लिएर चासो बढेको छ ।