सानेपामा कांग्रेस केन्द्रीय कार्यसमिति बैठक सुरु

काठमाडौं । नेपाली कांग्रेसको संस्थापन पक्षले बोलाएको केन्द्रीय कार्यसमिति बैठक सानेपामा सुरु भएको छ। बैठकमा संस्थापन पक्षका नेताहरू सहभागी छन्।

बिहान ८ बजे तय गरिएको बैठक दिउँसो सुरु भएको हो। बैठकले विशेष महाधिवेशनका आयोजक महामन्त्रीद्वय गगनकुमार थापा र विश्वप्रकाश शर्मासहित विशेष महाधिवेशन पक्षधर नेतामाथि कारबाही गर्ने तयारी गरेको बताइएको छ।

कांग्रेस केन्द्रीय सदस्य गुरू बरालका अनुसार, महामन्त्रीद्वयले सभापति शेरबहादुर देउवाले नेतृत्व छोड्नुपर्ने र आगामी फागुन २१ गते हुने निर्वाचनमा उम्मेदवारी नदिइ विश्राम लिनुपर्ने शर्त राखेका थिए। अन्य विषयमा सहमति जुट्ने संकेत देखिए पनि देउवाले नेतृत्व नछाड्ने अडान लिएपछि सहमति हुन सकेको छैन।