लोकप्रिय नारा होइन, देशलाई इमानदार नेतृत्व चाहिएको छ : बालेन शाह

काठमाडौँ । काठमाडौँ महानगरपालिकाका प्रमुख तथा राष्ट्रिय स्वतन्त्र पार्टी (रास्वपा) का नेता बालेन शाहले देशको विकासका लागि लोकप्रिय नाराभन्दा इमानदार नेतृत्व र दीर्घकालीन दृष्टिकोण आवश्यक रहेको बताएका छन्।

२७ औँ भूकम्प सुरक्षा दिवसको अवसरमा सामाजिक सञ्जालमार्फत धारणा सार्वजनिक गर्दै शाहले राष्ट्र निर्माणको नयाँ यात्रामा अघि बढ्ने संकेत गरेका हुन्। उनले २०७२ सालको विनाशकारी भूकम्पपछि सिभिल इन्जिनियरका रूपमा काभ्रेमा मात्रै करिब २५ सय घर निर्माण गरेको स्मरण गराउँदै गोरखा सहित देशका ३५ भन्दा बढी जिल्लामा काम गरेको अनुभव सुनाएका छन्।

नेपालजस्तो भूकम्पीय जोखिम भएको देश केवल इन्जिनियरिङ दृष्टिकोणबाट मात्र नबन्ने उल्लेख गर्दै शाहले भूगोल, समाज र नीतिलाई सँगसँगै अघि बढाउनुपर्ने बताए। यही बुझाइका साथ भारतमा ‘स्ट्रक्चरल इन्जिनियरिङ’ अध्ययन गरी विदेशमा बस्ने अवसर त्यागेर स्वदेश फर्किएको उनको भनाइ छ।

काठमाडौँ महानगरपालिकाको नेतृत्व सम्हाल्दा शब्दभन्दा कामलाई प्राथमिकता दिएको दाबी गर्दै उनले स्थानीय तहले चाहेमा जनताको जीवनमा प्रत्यक्ष प्रभाव पर्ने काम गर्न सकिन्छ भन्ने प्रमाणित भएको बताए। महानगरमा सुरु भएका सुधार र पारदर्शी प्रणालीलाई अब राष्ट्रिय स्तरमा विस्तार गर्ने समय आएको उनको भनाइ छ।

आगामी फागुन २१ गते हुने उपनिर्वाचनमा झापा–५ बाट निर्वाचन लड्ने चर्चाबीच आएको उनको भनाइलाई राजनीतिक रूपमा अर्थपूर्ण रूपमा हेरिएको छ। शाहले आफ्नो अभियान कुनै एक व्यक्तिको नभई सुरक्षित भविष्य चाहने सबै नेपालीको साझा अभियान भएको स्पष्ट पारेका छन्।