सुनसरी–१ बाट हर्कराज साम्पाङको मनोनयन दर्ता

धरान। श्रम संस्कृति पार्टीका अध्यक्ष हर्कराज राई (साम्पाङ)ले प्रतिनिधिसभा निर्वाचनका लागि सुनसरी–१ बाट मनोनयन दर्ता गरेका छन्।

मनोनयन दर्ताका लागि साम्पाङ समर्थकहरूसहित निर्वाचन आयोगको कार्यालय पुगेका थिए। यस क्रममा उनका समर्थकहरूले नाराबाजी गर्दै सहभागिता जनाएका थिए।

२०७९ सालको स्थानीय तह निर्वाचनमा स्वतन्त्र उम्मेदवारका रूपमा धरान उपमहानगरपालिकाको मेयर निर्वाचित भएका साम्पाङ संघीय राजनीतिमा सक्रिय रूपमा प्रवेश गरेका हुन्।

मनोनयन दर्तापछि सञ्चारकर्मीहरूसँग कुरा गर्दै उनले अब संघीय सरकारको नेतृत्व गर्ने लक्ष्यसहित चुनावी मैदानमा उत्रिएको बताए। उनले वैकल्पिक राजनीतिक धार निर्माण गर्ने र श्रम तथा संस्कृतिमा आधारित शासन प्रणाली स्थापना गर्ने दाबी गरे।

साम्पाङको उम्मेदवारीसँगै सुनसरी–१ मा चुनावी प्रतिस्पर्धा थप चासोको विषय बनेको छ। स्थापित दल र वैकल्पिक राजनीतिक शक्तिबीच हुने प्रतिस्पर्धाले यस क्षेत्रको राजनीतिक समीकरणलाई नयाँ दिशातर्फ लैजाने अपेक्षा गरिएको छ।