विशेष महाधिवेशनबाट निर्वाचित पदाधिकारी शुक्रबार पार्टी कार्यालय जाने

काठमाडौं। नेपाली कांग्रेसको गत पुस २७ देखि ३० गतेसम्म सम्पन्न विशेष महाधिवेशनबाट सर्वसम्मत सभापतिमा निर्वाचित गगन थापा नेतृत्वको केन्द्रीय कार्यसमिति शुक्रबार पार्टी केन्द्रीय कार्यालय सानेपामा जाने भएको छ।

सभापति थापा पक्षीय नेता मनोजमणि आचार्यका अनुसार शुक्रबार दिउँसो १ बजे सभापति थापा, पदाधिकारी तथा केन्द्रीय सदस्यहरू पदबहालीका लागि सानेपास्थित पार्टी कार्यालय जाने कार्यक्रम रहेको छ।

विशेष महाधिवेशनबाट गगन थापा सभापतिमा निर्वाचित भएका हुन् भने विश्वप्रकाश शर्मा र पुष्पा भुसाल उपसभापति चयन भएका छन्। यस्तै, गुरुराज घिमिरे र प्रदीप पौडेल महामन्त्रीमा निर्वाचित भएका छन्।

सह–महामन्त्रीमा डा. डिला सङ्ग्रौला पन्त, फरमुल्लाह मन्सुर, योगेन्द्र चौधरी, उदय शमशेर राणा, कर्णबहादुर बुढा, बहादुर सिंह लामा र मुक्ता यादव चयन भएका छन्। विशेष महाधिवेशनले १३५ सदस्यीय केन्द्रीय कार्यसमिति सर्वसम्मत रूपमा चयन गरेको थियो।

२०७८ सालमा सम्पन्न १४औँ महाधिवेशनबाट महामन्त्रीमा निर्वाचित गगन थापा र विश्वप्रकाश शर्माको नेतृत्वमा सम्पन्न विशेष महाधिवेशनलाई शेरबहादुर देउवा र डा. शेखर कोइराला समूहले अस्वीकार गरेका थिए।

उक्त विशेष महाधिवेशनविरुद्ध दुवै समूह निर्वाचन आयोग र सर्वोच्च अदालत पुगेका थिए। निर्वाचन आयोगले थापा नेतृत्वको केन्द्रीय कार्यसमितिलाई आधिकारिकता दिइसकेको छ।

सर्वोच्च अदालतले पनि देउवा र कोइराला समूहले दायर गरेको रिटमा अन्तरिम आदेश दिन अस्वीकार गरेपछि विशेष महाधिवेशनबाट चयन भएको कार्यसमिति पदबहालीका लागि पार्टी केन्द्रीय कार्यालय जान लागेको हो।