मतदातालाई धन्यवाद दिन गाउँगाउँ पुग्दै चन्द

बैतडी — प्रतिनिधिसभा सदस्य निर्वाचनमा बैतडीबाट उम्मेदवार बनेका नेपाली कांग्रेसका नेता चतुर बहादुर चन्दले मतदातासँग भेटघाट कार्यक्रम सुरु गर्नुभएको छ । निर्वाचनमा राष्ट्रिय स्वतन्त्र पार्टी (रास्वपा)का उम्मेदवार हरीमोहन भण्डारीसँग केही मतान्तरले पराजित भएपनि चन्द मतदातालाई धन्यवाद दिन गाउँगाउँ पुग्न थाल्नुभएको हो ।

यसैक्रममा उहाँले मंगलबार बैतडीको शिवनाथ गाउँपालिकामा मतदाता भेटघाट कार्यक्रम सम्पन्न गर्नुभएको छ । कार्यक्रममा स्थानीय मतदातासँग प्रत्यक्ष संवाद गर्दै चन्दले निर्वाचनका क्रममा आफूलाई दिएको समर्थन र सहयोगका लागि आभार व्यक्त गर्नुभयो ।

भेटघाटका क्रममा चन्दले लोकतन्त्रमा जनमत सर्वोपरि हुने भन्दै मतदाताको निर्णयलाई सम्मान गर्ने बताउनुभयो । उहाँले आगामी दिनमा पनि जनताका समस्या र आवश्यकताका विषयमा निरन्तर आवाज उठाउँदै जनतासँगै रहने प्रतिबद्धता व्यक्त गर्नुभयो ।

कार्यक्रममा नेपाली कांग्रेसका स्थानीय नेता–कार्यकर्ता, सुभेच्छुक तथा सर्वसाधारण मतदाताको उपस्थिति रहेको थियो । चन्दले आगामी दिनमा जिल्लाका अन्य पालिकामा समेत यस्तै धन्यवाद तथा भेटघाट कार्यक्रम गर्ने बताउनुभएको छ ।

चन्द नेपाली कांग्रेस बैतडीका सभापती समेत हुन् ।