कांग्रेस कार्यसम्पादन समितिको बैठक आह्वान

काठमाडौं । नेपाली कांग्रेस केन्द्रीय कार्यसम्पादन समितिको बैठक आह्वान गरिएको छ। बैठक बिहीबार (पुस २४) अपराह्न ४ बजे पार्टी केन्द्रीय कार्यालय सानेपामा बस्नेछ।

कांग्रेसका मुख्यसचिव कृष्णप्रसाद पौडेलले जारी गरेको सूचनाअनुसार बैठक पार्टीको केन्द्रीय कार्यालय बी.पी. स्मृति भवन, बी.पी. नगर, ललितपुरमा आयोजना गरिनेछ। सूचनामा केन्द्रीय कार्यसम्पादन समितिका पदाधिकारी तथा सदस्यहरूलाई निर्देशानुसार उपस्थित हुन अनुरोध गरिएको छ।

पार्टीभित्र विशेष महाधिवेशनलाई लिएर चुलिएको विवादका कारण बैठक बोलाइएको संस्थापन पक्षका नेताहरूले बताएका छन्। विशेष महाधिवेशनले पार्टीलाई विभाजनतर्फ लैजान सक्ने आशङ्का रहेको भन्दै त्यसबारे छलफल गर्न बैठक आह्वान गरिएको जनाइएको छ।

पछिल्लो समय नेपाली कांग्रेसभित्र आन्तरिक विवाद बढ्दै गएको छ। महामन्त्रीद्वय गगन थापा र विश्वप्रकाश शर्माले पुस २७ र २८ गते काठमाडौंमा विशेष महाधिवेशन आयोजना गरिने भन्दै प्रतिनिधिहरूलाई उपस्थित हुन आग्रह गरेका छन्। यद्यपि, संस्थापन पक्षले विशेष महाधिवेशनको औचित्य समाप्त भइसकेको दाबी गर्दै आएको छ।