निर्वाचन आयोगको निर्णयविरुद्ध देउवा समूह सर्वोच्चमा, माघ ६ गते रिटको पेसी

काठमाडौं । नेपाली कांग्रेसका शेरबहादुर देउवा समूहले पार्टीसम्बन्धी निर्वाचन आयोगको निर्णय उल्ट्याउन माग गर्दै आइतबार (माघ ४) सर्वोच्च अदालतमा रिट दायर गरेको छ। सर्वोच्च प्रशासनका अनुसार रिट दर्ता भइसकेको छ।

तत्कालीन कार्यवाहक सभापति पूर्णबहादुर खड्काले उक्त रिट दर्ता गराएका हुन्। देउवा समूहका कानुन व्यवसायीले रिटको तत्काल सुनुवाइका लागि आग्रह गरे पनि आजै सुनुवाइ सम्भव नभएको जानकारी सर्वोच्च प्रशासनले दिएको छ।

सर्वोच्च प्रशासनले रिटको पेसी यही माघ ६ गतेका लागि तोकेको छ। भोलि (माघ ५) सार्वजनिक बिदा रहेकाले त्यसपछि मात्रै सुनुवाइ हुने जनाइएको छ।

निर्वाचन आयोगले पार्टीको विशेष महाधिवेशनबाट निर्वाचित सभापति गगन थापा नेतृत्वको कार्यसमितिलाई मान्यता दिएपछि असन्तुष्ट देउवा समूह सर्वोच्च अदालत पुगेको हो। यस विषयले नेपाली कांग्रेसभित्रको आन्तरिक विवाद थप चर्किने संकेत देखिएको छ।

रिट दायर गर्ने क्रममा खड्कासँगै प्रकाशमान सिंह, विमलेन्द्र निधि, मानबहादुर विश्वकर्मा, मीन विश्वकर्मालगायत नेताहरू सर्वोच्च पुगेका थिए । सर्वोच्चको सुरक्षा व्यवस्था कडा पारिएको छ ।