भक्तिमय सिर्जना लिएर जनक महरा भजन–संगीतमा सक्रिय

बैतडी ।
कलाकर्ममा २५ वर्षदेखि सक्रिय कलाकार जनक महराले आफ्नो पहिलो भजन–गीतको एल्बम सार्वजनिक गरेका छन् । ‘दर्शन दिनाकन’ र ‘त्रिपुरा भगवती मैया बजारमा छन्’ शीर्षकका दुई भजन सार्वजनिकसँगै उहाँको धार्मिक सिर्जनायात्रा औपचारिकरूपमा सुरु भएको हो ।

बैतडीको दशरथचन्द नगरपालिकाका स्थायी बासिन्दा महरा डेउडा, छलिया, ठाडीभाका लगायत सुदूरपश्चिमेली सांस्कृतिक गीत–संगीतका स्थापित नाम हुन् । उनले अहिलेसम्म ७० भन्दा बढी गीत बजारमा ल्याइसकेका छन् । तर भजन भने उनले पहिलोपटक सार्वजनिक गरेका हुन् ।

त्रिपुरा सुन्दरी मातामा समर्पित भजन सार्वजनिक भएपछि धेरै श्रद्धालु भक्तजन प्रभावित बनेका छन् । विशेषगरी ‘त्रिपुरा भगवती मैया’ गीतले त्रिपुरा मेला र दर्शनको वातावरण झनै उत्साहपूर्ण बनाएको श्रद्धालुहरूको प्रतिक्रिया छ। गीतले सुदूरपश्चिमेली लोकधुन, भक्ति भावना र सांस्कृतिक पहिचानलाई सशक्त रूपमा अभिव्यक्त गरेको देखिन्छ।

महरा सुदूरपश्चिमेली संस्कृतिको संरक्षण तथा प्रवर्द्धनमा निरन्तर सक्रिय कलाकार मानिन्छन्। भजनमार्फत सांस्कृतिक तथा धार्मिक गीतको क्षेत्रमा पनि आफूलाई उभ्याउने लक्ष्य आफूले लिएको महराले बताए।

भक्तिभाव, मौलिक लय र क्षेत्रीय पहिचान मिसिएको जनक महराको यो पहिलो भजन–एल्बमले धार्मिक संगीतको क्षेत्रमा नवीन ऊर्जा थपेको छ।